Ikja e mjekëve nga Kosova po vazhdon edhe në këtë kohë pandemie. Sipas zyrtarëve shëndetësorë, vetëm gjatë vitit 2020 kanë ikur jashtë vendit 101 mjekë. E në bazë të një hulumtimi të bërë nga Federata Sindikale e Shëndetësisë rezultoi se 90 për qind e mjekëve të rinj janë duke u përgatitur që të emigrojnë jashtë vendit.

Trendi i ikjes së mjekëve nga Kosova për të kërkuar kushte më të mira të punës dhe pagë më të lartë po vazhdon.

As pandemia me COVID-19 që izoloi botën, nuk i ka ndalur kërkesat e tyre për të migruar jashtë vendit.
Kështu thonë zyrtarë të fushës, sipas të cilëve vetëm gjatë vitit 2020 kanë ikur jashtë vendit 101 mjekë. Ndryshe në Kosovë janë rreth 300 mjekë që vazhdojnë të jenë të papunë. Prej tyre rreth 200 janë mjekë stomatologë.

-Advertisement-

Ajo që shihet si brengosëse sipas kryetarit të Federatës Sindikale të Shëndetësisë, Blerim Syla, është se sipas hulumtimeve që ata i kanë bërë, 90 për qind e mjekëve të rinj kanë deklaruar se do të ikin jashtë Kosovës.

‘’ Po e them ekskluzivisht për emisionin tuaj se jemi në përfundim të një studimi që jemi duke e bërë dhe rezultatet tregojnë se 90 për qind e mjekëve të rinj janë duke u përgatitur që të emigrojnë jashtë vendit’’, tha Syla.

Kryetari i Odës së Mjekëve të Kosovës, Pleurat Sejdiu, tha për Radio Kosovën se trendi i ikjes së mjekëve nga vendi nuk ka ndryshuar as gjatë vitit 2020.

’’ Gjatë vitit 2020 kanë ikur jashtë Kosovës 101 mjekë, 90 për qind kanë qenë mjekë të rinj dhe mjekë të përgjithshëm.
Përkundër mbylljes së kufijve për shkak të pandemisë trendi i ikjes ka qenë alarmante.
Kërkesa zyrtare përmes kontakteve të odës nuk ka pasur nga ana e shteteve të tjera, por kanë qenë ikje individuale dhe kontakte private’’, tha ai.

Ndryshe mosha mesatare e mjekëve në Kosovë është 53 vjeç. Derisa interesimi i mjekëve të rinj është migrimi jashtë vendit.
Zoti Sejdiu tha se i kanë alarmuar institucionet shtetërore për trendin e ikjes së mjekëve , por siç thotë ai, nuk është ndërmarrë ndonjë hap konkret për ndaljen e trendit të ikjes së tyre.

‘’ Ne ua kemi bërë me dije institucioneve tona shëndetësore se arsyet që i kanë dhënë mjekët që po largohen nga Kosova, janë kushtet e punës e më pas paga, mundësia e specializimeve kualitative. Faktori kryesor mbetet kushtet e punës dhe nuk kemi parë asnjë hap të përmirësimit në këtë drejtim’’, tha Sejdiu.

Ndërkohë në Odën e Mjekëve të Kosovës, gjatë vitit 2019, thuhet se 115 mjekë kanë kërkuar dokumente për punësim jashtë Kosovës, derisa vitit 2018 ishte përmbyllur me kërkesë të 110 mjekëve për certifikata për punësim jashtë vendit.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-