Lajme

I vjetruar dhe shqyer e në gjysmë shtizë flamuri te “Rrethi i Flamurit”

Autori: Islam Morina 20:18 | 07 June 2022

Tash e disa ditë flamuri kombëtar që është i vendosur te “Rrethi i Flamurit”, në Prishtinë vazhdon të mbetet i shqyer e në gjysmështizë.

Ligji Nr. 03/L-038, për përdorimin e simboleve shtetërore të Kosovës, rregullon edhe përdorimin dhe mënyrën e përdorimit të flamujve kombëtarë të të gjitha etnive në Kosovë, raporton Gazeta Infokus.

Neni 6 pika 6.1 e ligjit thotë se: “Çdo qytetar i Republikës së Kosovës ka të drejtë të përdorë flamujt kombëtarë në pajtim me këtë ligj dhe me legjislacionin tjetër në fuqi”.

Në bazë të këtij ligji, flamuri kombëtar nuk guxon të ekspozohet në publik nëse ai është i vjetruar apo dëmtuar, e që në rastin konkret flamuri te “Rrethi i Flamurit” edhe është i vjetruar edhe i dëmtuar”.

“Ndalohet vendosja publike e flamujve kombëtarë nëse janë të vjetruar apo të dëmtuar”, thuhet në nenin 6 të ligjit, pika 6.4.

Për më tepër, si pasojë e mos kujdesit, flamuri kombëtar te “Rrethi i Flamurit”, ka rënë në gjysmështizë. Vendosja e flamujve në gjysmështizë bëhet vetëm me vendim të qeverisë dhe atë kur vendi shpallë ditë zie kombëtare.

“Në rastet e ditëve të zisë të shpallura në Republikën e Kosovës, flamuri shtetëror ngrihet në
gjysmështizë. Mënyra e vendosjes dhe heqjes së flamurit shtetëror përcaktohet me akt përkatës nënligjor të nxjerrë nga Qeveria e Republikës së Kosovës”, thuhet në nenin 8.1 të këtij ligji. /Gazeta Infokus/

Të tjera

Fokusi

lajme