Lajme

Hykmete Bajrami reagon pas pezullimit të tenderit 137 milionësh të KEK-ut: Mbulim i skemës serioze korruptive

Autori: Gazeta inFokus 10:44 | 04 July 2025

Deputetja e Lidhjes Demokratike të Kosovës, Hykmete Bajrami, ka reaguar ashpër ndaj pezullimit të tenderit prej 137 milionë eurosh të Korporatës Energjetike të Kosovës (KEK), vetëm një ditë para afatit përfundimtar të dorëzimit të ofertave, duke ngritur dyshime për një skemë serioze korruptive, shkruan Gazeta Infokus.

Tenderi për “Rehabilitimin dhe Modernizimin e Njësisë A3” në Termocentralin Kosova A, një projekt i konsideruar jetik për sigurinë energjetike të vendit, sipas Bajramit, është zhvilluar në kushte të paqarta dhe me shkelje të theksuara procedurale.

“Ky tender është hapur pa studim fizibiliteti, pa përshkrim teknik të punimeve dhe me mungesë të plotë transparence. Procedura u ndryshua disa herë, duke krijuar hapësirë për manipulime, ndërsa vetë procesi u zhvillua si tender i hapur me negociata të mbyllura – duke përcaktuar paraprakisht vetëm 6 ofertues të pranueshëm, pa paraparë penalizime në rast të mosrealizimit të punimeve,” ka deklaruar ajo.

-Advertisement-

Deputetja Bajrami ka ngritur edhe disa pyetje serioze lidhur me pezullimin e procesit:

Pse u pezullua tenderi vetëm një ditë para afatit përfundimtar?
Kush ka paraqitur ankesë dhe përmes cilës procedurë, kur në këtë fazë nuk ishte paraparë asnjë mundësi ankese?
Pse janë fshirë ofertat nga sistemi dhe po kërkohet dorëzimi i tyre nga fillimi?
A po tentohet të krijohet kohë për ndonjë kompani të favorizuar që të përgatisë ofertën?
Dhe, nëse vërtet ka pasur shkelje, pse tenderi nuk u anulua plotësisht?

“Ky pezullim nuk është asgjë më shumë se një manovër për të mbuluar një aferë të mundshme korruptive me vlerë 137 milionë euro. Ai rrezikon të rikthehet sërish me të njëjtat probleme dhe përfitues të dyshimtë. Tenderi duhet të anulohet plotësisht dhe të hetohet deri në fund. Derisa skema të tilla veprojnë të paprekura, qytetarët po e paguajnë çmimin e lartë të importit të energjisë,” ka përfunduar reagimin e saj Hykmete Bajrami.

Subscribe në YouTube: GAZETA INFOKUSI