Lajme

Hovenier: Një pjesë e marrëveshjes së Ohrit tashmë ka filluar të zbatohet

Autori: Gazeta inFokus 19:38 | 30 March 2023

Ambasadori amerikan në Kosovë, Jeffrey Hovenier, ka deklaruar se marrëveshja e Ohrit ka filluar të implementohet.

Ai ka thënë se ShBA-të besojnë që kjo marrëveshje duhet zbatuar urgjentisht, dhe thotë se këtë pikëpamje e ka ndarë edhe vetë kryeministri i Kosovës, Albin Kurti, përcjell gazeta online Reporteri.net.

“Para së gjithash, unë do të thoja se një pjesë e marrëveshjes po zbatohet tashmë dhe natyrisht është një proces për të zbatuar të gjithë marrëveshjen. Shtetet e Bashkuara besojnë fuqishëm se marrëveshja duhet të zbatohet urgjentisht dhe ne gjithashtu kemi dëgjuar të njëjtën gjë të thotë edhe kryeministri i Kosovës.”, ka thënë Hovenier për T7.

Hovenier tha se hapi i radhës në zbatim të marrëveshjes është takimi i 4 prillit, në nivel kryenegociatorësh.

Me ftesë të komunitetit ndërkombëtar, më 4 prill, zëvendëskryeministri Besnik Bislimi dhe shefi i të ashtuquajturës “Zyrë për Kosovën” në qeverinë e Serbisë, Petar Petkoviç, do të mblidhen në një takim në Bruksel.

“Hapi tjetër është takimi më 4 prill, e dini se dialogu i Miroslav Lajçakut është një dialog i ri i lehtësuar që po i tërheq kryenegociatorët të bisedojnë pikërisht për ato çështje dhe ne presim një takim të suksesshëm në mënyrë që të ecim përpara zbatimin e marrëveshjes”, ka shtuar Hovenier.

Kujtojmë se dialogu Kosovë-Serbi, i ndërmjetësuar nga Bashkimi Evropian, është dakorduar që të vazhdohet me bazë propozimin evropian. Kështu u vendos në takimin e 27 shkurtit në Bruksel, mes kryeministrit Kurti dhe presidentit Vuçiq.

Më 18 mars, të dy u dakorduan edhe për aneksin e zbatimit të kësaj marrëveshjeje, anipse një dakordim i tillë nuk u vulos me nënshkrim.

 

 

 

 

 

Storie Suksesi – Studentët e Kolegjit Universum fitues të garës Mobile Hackathon App

Të tjera

Fokusi

lajme