Lajme

Hoti ‘godet’ Haradinajn pasi vizitoi Karaçevën: S’ka nevojë për defilime në vendngjarje, siguria nuk rrezikohet

Autori: Gazeta inFokus 18:25 | 08 August 2020

Kryeministri i Qeverisë së Kosovës, Avdullah Hoti, ka thënë se s’ka nevojë për defilime në Karaçevë dhe as për deklarata pompoze pa e ditur se çka ka ndodhur në kufirin Kosovë-Serbi.

Ky reagim i Kryeministrit ka ardhur pasi sot Ramush Haradinaj shkoi në fshatin kufitar dhe kërkoi reagim të shtetit.

“Siguria në Kosovë nuk mund të rrezikohet nga askush. Nuk ka vend për panik, dhe as nevojë për deklarata pompoze e defilime në vendngjarje, pa pasur idenë se si ka ndodhur ngjarja”, ka shkruar Kryeministri në një reagim në FB.

-Advertisement-

Hoti ka thënë se Shefi i KFORI’it ia ka sqaruar Ministrit të Brendshëm gjithë ngjarjen.

Postimi i plotë i Hotit:

Lidhur me ngjarjen e djeshme, sot Ministri i Punëve të Brendshme është takuar me Komandantin e KFOR-it, Gjeneralin Risi, me të cilin kam komunikuar edhe vetë mbrëmë dhe sot. Në këtë takim është sqaruar se si ka ndodhur kjo ngjarje. Kam qenë në komunikim edhe me Kryetarin e Kamenicës, z.Qendron Kastrati, me të cilin së shpejti do të vizitojmë qytetarët tanë në ato fshatra.

Siguria në Kosovë nuk mund të rrezikohet nga askush. Nuk ka vend për panik, dhe as nevojë për deklarata pompoze e defilime në vendngjarje, pa pasur idenë se si ka ndodhur ngjarja.

Kufijtë e Republikës së Kosovës janë të sigurt dhe të njohur ndërkombëtarisht nga pjesa më e fuqishme dhe demokratike e botës.

Në ditët në vijim do të merren veprime konkrete nga institucionet e sigurisë së Kosovës, në koordinim me mekanizmat ndërkombëtarë të sigurisë, përfshirë këtu patrullimet e përbashkëta me KFOR-in.

Dëshiroj të falënderoj Gjeneralin Risi për bashkëpunimin e ngushtë në vazhdimësi.

Subscribe në YouTube: GAZETA INFOKUSI

Të tjera

Fokusi

lajme