Nga Gurakoci i qytezës së vogël të Istogut, ngjiti majat e futbollit botëror.

Fatmire Alushi, e cila dikur ishte edhe futbollistja e tretë më e mirë në botë, ka folur gjerë e gjatë për jetën e saj, në një rrëfim ekskluziv për Gazetën inFokus.

Fatmirja, që njihet si Lira, çdo verë viziton fshatin ku ka lindur.

Nga shtëpia e saj në Gurakoc, ajo ka treguar për fillimet jo të lehta në futboll.

Në fillim duke mos qenë i vetdijshëm për talentin e vajzës, Ismeti, babai i Lirës nuk e lejonte atë të luante futboll.

Megjithatë, kur babai i Lirës pa rastësisht talentin e vajzës, u mahnit.

Nga ai moment, vendosi ta përkrahte Lirën, e cila bëri atë që deri atëherë asnjë vajzë shqiptare nuk e kishte arritur.

Momenti më i rëndësishëm në karrierë për të thotë se është fitimi i kupës së botës, por edhe momenti kur u shpall futbollistja e tretë më e mirë në botë, në vitin 2010.

Futbolli ka edhe një rëndësi tjetër të veçantë për Lirën. Ajo është e martuar me ish-futbollistin e kombëtares së Kosovës, Enis Alushi. Mënyra si u takuan ata është mjaftë interesante. Futbolli ishte ai që i bashkoi.

Lira ka folur edhe për fëmijët. Edhe vajza e djali i saj e donë shumë futbollin.

Megjithatë, përkundër shumë sukseseve që i ka arritur vet si futbolliste, ajo nuk ka shumë dëshirë që edhe vajza e saj ta vazhdojë këtë rrugë.

Me shumë emocion ajo ka folur edhe për futbollisten që u gjet e vdekur në një lum në Itali, Floriana Ismaili. / Gazeta inFokus