Lajme

Hill: Kur Borrelli është i pakënaqur, ShBA-ja është edhe më e pakënaqur

Autori: Gazeta inFokus 20:31 | 15 September 2023

Ambasadori amerikan në Beograd, Christopher Hill, e komentoi takimin e djeshëm të nivelit të lartë në kuadër të dialogut ndërmjet Kosovës dhe Serbisë në Bruksel.

Ai tha se kur shefi i Politikës së Jashtme të BE-së, Josep Borrell është i pakënaqur me rezultatet, ShBA-ja është edhe më e pakënaqur.

“Ata bënë shumë përpjekje dhe mendoj se ShBA-ja shprehu një qëndrim mjaft parimor se ne do ta mbështesim zotin Borrell. Nëse ai është i kënaqur, ne do të jemi; nëse ai nuk është i kënaqur, ne do të jemi shumë të pakënaqur”, tha ambasadori amerikan për agjencinë serbe të lajmeve “Tanjug”.

-Advertisement-

Negociatat e djeshme, ai i cilësoi si “vërtet të vështira”, por shtoi se Serbia i kishte bërë detyrat e shtëpisë dhe ishte përgatitur mirë.

Ambasadori amerikan shtoi se Bashkimi Evropian ka një përgjegjësi të madhe.

Hill thekson se njerëzit duhet të kuptojnë se në kuadër të dialogut të Brukselit janë në fakt dy grupe negociatash – negociatat ndërmjet palës së Beogradit dhe BE-së dhe palës së Prishtinës dhe BE-së.

“Unë nuk kam marrë pjesë në negociata, nuk ka pasur as amerikanë atje. Por sigurisht në bazë të asaj që kam lexuar, z.Borrell tha se pala serbe erdhi mirë e përgatitur dhe në thelb u pajtua me atë që propozoi Bashkimi Evropian”, tha diplomati amerikan.

Ai shtoi se, me sa e kuptonte ai, Bashkimi Evropian u përpoq të propozonte një lloj formule kompromisi.

“Me sa kuptoj unë, në bazë të asaj që tha z.Borrell, ata po përpiqen të vendosin një plan për sekuencën e ngjarjeve. Çështja e Asociacionit të Komunave (me Shumicë, shën.red.) Serbe, çështja e një hapësire më të madhe të Kosovës për ndërkombëtarizim, po mundohen të punojnë për vendosjen e rendit të këtyre elementeve. Pra, ne duhet të shohim se si funksionon e gjithë kjo”, përfundoi Hill.

Subscribe në YouTube: GAZETA INFOKUSI
Etiketa:
Nëntori sjellë Magjinë në ETC
-Advertisement-

Të tjera

Fokusi

lajme