Lajme

Haziri: Jemi në fazën e fundit të diskutimeve

Autori: Gazeta inFokus 14:49 | 10 January 2020

Nënkryetari i Lidhjes Demokratike të Kosovës, Lutfi Haziri nuk ka treguar se a do të ketë sot takimi në mes liderit të VV-së, Albin Kurti dhe atij të LDK-së, Isa Mustafa, por që tha se pas zgjedhjes së kryetarit të Kuvendit, është imponuar një situatë e re e cila kërkon durim që bisedimet të shteren deri në atë fazë sa të dy palët ta arrijnë një marrëveshje.

Ai tha se ekipet e të dyja partive janë duke punuar në arritjen e një koalicioni qeverisës.

“Çdo kohë mund të ndodh, është çështje që iu përket dy liderëve, por ekipet janë duke punuar brenda. Ekipet janë duke punuar brenda në definimin e qartë të angazhimeve konkrete në mënyrë që vërtetë të ketë rol dhe përgjegjësi të saktë dhe të definuar qartë, në mënyrë që të mos ndodhin në të ardhmen të ketë veprime të njëanshme të një partneri apo partnerit tjetër. Sa i përket LDK-së nuk do të ketë kurrë veprime të njëanshme, ne kemi thënë dhe kemi mbajt fjalën. Nëse ka veprime të domosdoshme për të mos lejuar bllokimin e institucioneve, ne e kemi dhënë votën tonë”, tha ai.

-Advertisement-

Ai tha se janë duke u diskutuar të gjitha opsionet pas situatës së krijuar më 26 dhjetor, kur Glauk Konjufca i LVV-së është zgjedhur në krye të Kuvendit të Kosovës.

“Janë duke u diskutuar opsionet në tavolinë, tashmë opsionet kanë të bëjnë me situatën e re që është krijuar pas 26 dhjetorit, zgjedhja e kryetarit të Kuvendit dhe konstituimi i Kuvendit jashtë marrëveshjes, por ne respektim të procedurave të zgjedhjeve, kështu që kjo situatë e re ka imponuar dhe kërkon pak durim që bisedimet të shteren deri në atë fazë sa të dy palët sipas parimit të përfaqësimit të drejtë ta arrijnë një marrëveshje, e cila për katër vitet e ardhshme definon rolin kushtetues të dy subjekteve politike”, tha ai.

Sa i përket letrës së presidentit Thaçi dërguar LVV-së rreth dërgimit të emrit të mandatarit për kryeministër, Haziri tha se presidenti duhet të pres derisa t’i shkojë emri sipas procedurave.

“Presidenti duhet të pres derisa t’i shkojë emri, emri do t’i shkojë sipas procedurave”, tha ai.

I pyetur se a do të kërkojë LDK që pozita e kreut të Kuvendit të rinegociohet, ai tha se marrëveshja duhet të shihet si pako dhe si e tillë duhet t’i definojë përgjegjësitë.

“Nuk ka të bëjë me një shtyllë apo me një segment apo fragment të marrëveshjes. Marrëveshja si tërësi duhet me u pa a është në pako dhe si e tillë duhet t’i definojë përgjegjësitë. Jemi në hapin e fundit besoj të zbardhjes së krejt këtij procesi”, tha ai.

Kurse, i pyetur se kur do të nënshkruhet marrëveshja, Haziri u shpreh se ajo është përgjigje 1 milion dollarëshe.

“Ajo është përgjigje 1 milionë dollarëshe”, tha ai.

Subscribe në YouTube: GAZETA INFOKUSI
Vetëm edhe 4 ditë nga Bootcamp me Alan Greenberg, ish-Drejtorin për Edukim në Apple, Apliko Tani

Të tjera