Lajme

Hashim Thaçi: Kosova duhet të ndërtohet si shtet ku barazia gjinore do të jetë e pacenueshme

Autori: Gazeta inFokus 13:43 | 19 December 2017

Konferenca e mbajtur sot “Përmirësimi i llogaridhënies institucionale për zbatimin e Ligjit për barazi gjinore në vendimmarrje” e organizuar nga Qendra Kosovare për Studime Gjinore, ka për qëllim promovimin e iniciativës për arritjen e balancës gjinore në pozita vendimmarrëse në institucionet publike përmes përmirësimit të llogaridhënies institucionale.

Në këtë konferencë pjesëmarrës ishte Presidenti Hashim Thaçi, i cili tha se Kosova duhet të ndërtohet si shtet ku barazia gjinore do të jetë e pacenueshme, shkruan Infokusi.com

“Këto vlera janë të përjetësuara në Kushtetutën e Kosovës ku populli i Kosovës është i vendosur të ndërtojë një shtet të qytetarëve të barabartë. Barazia gjinore nuk është diçka e sajuar nga dëshira por e sanksionuar nga aktet ligjore”, ka thënë Thaçi.

-Advertisement-

E pranishme në këtë organizim, ishte edhe Kryetarja e Komisionit Qendror të Zgjedhjeve, Valdete Daka, e cila foli për aspektin ligjor dhe kujdesin për barazinë gjinore, po ashtu edhe për pjesëmarrjen e femrave në zgjedhje.

“Përfaqësuesit e subjekteve politike u besojnë më shumë meshkujve sesa femrave, u besojnë më shumë muskujve sesa gjinisë së bukur… Nuk e kemi asnjë grua si kryetare të komunave, por kjo ka qenë dëshira e votuesve”, tha ajo.

Kjo konferencë është pjesë e projektit “Përmirësimi i llogaridhënies për barazinë gjinore në vendimmarrje”, i cili është realizuar me përkrahjen e projektit Promovimi i Shoqërisë Demokratike (DSP) i financuar nga Zyra Zvicerane për Bashkëpunim në Kosovë (SDC) dhe Ministria e Punëve të Jashtme e Danimarkës (DANIDA) dhe menaxhuar nga Fondacioni Kosovar për Shoqëri Civile (KCSF).

Pas konferencës u hap edhe diskutimi, ku të pranishmit adresuan problemet dhe kërkesat e tyre lidhur zbatimin e barazinë gjinore në vendimmarrje./Infokusi.com

Subscribe në YouTube: GAZETA INFOKUSI
Etiketa:
-Advertisement-

Të tjera

Fokusi

lajme