Lajme

Haradinaj: Politikat bllokuese, shantazhuese dhe uzurpuese – kryefjala e Albin Kurtit

Autori: Gazeta inFokus 15:30 | 17 Prill 2025

Kryetari i Aleancës për Ardhmërinë e Kosovës (AAK), Ramush Haradinaj, ka kritikuar ashpër kryeministrin në detyrë, Albin Kurti, duke e akuzuar për bllokim institucional dhe për qëndrime autokratike që, sipas tij, po e mbajnë peng vendin tash e katër vjet, shkruan Gazeta Infokus.

“Politikat bllokuese, shantazhuese dhe uzurpuese janë kryefjala e Albin Kurtit,” ka deklaruar Haradinaj, duke reaguar pas pezullimit të seancës konstituive të Kuvendit të Kosovës. “Pezullimi i seancës në mënyrë arbitrare, edhe pse ishin numrat për vazhdim, e shfaq qartë se kush janë këta njerëz që e mbajnë peng Kosovën,” ka shtuar ai.

Haradinaj ka theksuar se Kosova nuk duhet të lejojë të rrëshqasë nga vlerat demokratike dhe properëndimore për shkak të, siç i cilëson ai, “tekeve dhe dëshirave autokratike të lindjes”.

-Advertisement-

Ai ka bërë thirrje për reflektim dhe veprim të qartë:

“Dorëhiqu – nuk mundesh t’i kesh dy pozita. Propozojeni dhe formojeni kryesinë e Kuvendit. Formo Qeverinë. Nëse nuk mundesh – ik, lësho rrugë.”

Në përmbyllje, Haradinaj paralajmëroi se nëse nuk gjendet një zgjidhje institucionale, “pushteti do t’i kthehet sovranit – e aty mashat do të digjen.”