Lajme

Halitaj: Kandidati për kryeministër, lider i ardhshëm i LDK-së

Autori: Gazeta inFokus 15:59 | 15 Maj 2017

Kur një lider partie dështon në përmbushje të objektivave të tij, pavarësisht pengesave që mund t’i jenë bërë nga të tjerët, ai duhet të tërhiqet nga pozita. Kështu do të duhej të vepronte edhe kryetari i LDK-së Isa Mustafa pas rrëzimit të Qeverisë. Kështu i ka thënë gazetës “Zëri” kryeredaktori i “AktivPress-it”, Agron Halitaj.

“Mustafa bashkë me një pjesë të Kryesisë do të duheshin ta pranonin se kanë gabuar që kanë hyrë në koalicion me PDK-në dhe t’u hapnin rrugë njerëzve të rinj për ta marrë drejtimin e partisë. Meqë tash zgjedhjet janë afër dhe nuk ka kohë për t’i hyrë një reforme të mirëfilltë brenda partisë, krejt çka mund të bëhet në këto pak ditë është fuqizimi i figurave të reja gjatë fushatës zgjedhore”, ka thënë Halitaj.

Më tutje ai ka folur edhe për mundësitë e kësaj partie rreth kandidatit për kryeministër. Sipas Halitajt, është evidente se kreu i LDK-së është i interesuar që të investojë në nxjerrjen e një kandidati të ri për kryeministër, mirëpo, siç thotë ai, koha parazgjedhore imponon zgjidhje të shpejtë.

“U takon organeve të partisë që të përcaktohen për kandidatin për kryeministër, mirëpo për bindjen time ai do të duhej të nxirrej nga brenda e jo të rekrutohej nga jashtë”, ka thënë kryeredaktori i “Aktivpressit”.

-Advertisement-

Më tutje, ai ka argumentuar hipotezën e tij mbi atë se asnjë kandidat i jashtëm nuk do të mundë të mishërohej me elektoratin e një partie brenda pak ditësh.

“Ajo që duhet pasur parasysh është se cilido që e fiton besimin për të garuar si kandidat për kryeministër, do të shihet edhe si lider i ardhshëm i LDK-së. Prandaj LDK-ja me përzgjedhjen e kandidatit për kryeministër në një formë përcaktohet se kush do të jetë pasuesi i Mustafës”, ka përfunduar Halitaj.