Gucati në Hagë: Një punëtor i ZPS-së ka pirë raki në zyrën time
Autori: Gazeta inFokus 15:27 | 08 December 2021
Ish-kryetari i Organizatës së Veteranëve të Luftës së UÇK-së, Hysni Gucati ka thënë se një hetues i Zyrës së Prokurorit të Specializuar u ka thënë zyrtarëve të organizatës së mund t’i mbajnë dokumentet edhe për një muaj, në ditën kur hetuesit kishin shkuar në zyrat e OVL-UÇK për t’i konfiskuar ato. Në ditën e tretë të dëshmisë së tij para Dhomave të Specializuara në Hagë, Gucati ka thënë se mbi dosjet të cilat kishin arritur në OVL-UÇK ishte e vendosur një letër në të cilën bëhej e ditur se do të vinin edhe shtatë mijë dokumente të tjera.
I akuzuari Hysni Gucati ka thënë se një hetues i ZPS-së i cili e fliste gjuhën shqipe kishte shkuar në zyrat e organizatës dhe u kishte thënë se duhet t’i marrin dokumentet, por fillimisht Gucati ka thënë se hetuesi i ka fotografuar ato dhe ka konfirmuar se janë të Speciales.
Gucati, derisa është përgjigjur në pyetjet e prokurores Valeria Bolici, ka deklaruar t’i ketë thënë hetuesit se dorëzimin e tyre duan ta bëjnë në praninë e Policisë së Kosovës por sipas tij ai i ka thënë se edhe një muaj mund të qëndrojnë dokumentet në organizatë dhe policia nuk shkon të bëhet dëshmitar në pranim-dorëzim.
“Nëse ke qenë ti aty ashtu është siç thua ti, por unë po them që ti nuk ke qenë aty fare çka kemi biseduar ne. Zotëria më ka thënë ‘edhe një muaj ditë mund t’i mbani dokumentacionet, Policia e Kosovës nuk vjen’, dhe ne kemi rënë dakord bashkë me Tomë Gashin dhe inspektorin që fliste shqip dhe ja kemi dhënë shumë me mirësi, ka pirë edhe kafe në zyrën time, do ta tregoj edhe një sekret atëherë, ka pirë edhe raki njëri prej tyre në vendin e punës, ka pirë edhe raki në zyrën time një punëtor i juaji. Kjo është reale çka po them, nuk gënjej asnjë fjalë, nuk kam arsye të gënjej se nuk kam lind me gënjeshtra, nuk jetoj me gënjeshtra, nuk kam ardhur në burg me gënjeshtra”, ka thënë Gucati.
Ish-kryetari i OVL-UÇK ka thënë se në momentin e hapjes së paketës që në organizatë kishte arritur nga një person i panjohur, kanë qenë të pranishëm ai, Nasim Haradinaj e zyrtarë të tjerë të organizatës.
Letrën me numrin “7000” Gucati ka thënë se e ka hedhur pa qenë i vetëdijshëm për ndonjë rëndësi që mund të ketë në të ardhmen si dëshmi.
“Atë letër e konsiderova të pavlerë fare, një shkrim një shtatë dhe tre zero, asgjë më shumë, kjo është krejt çka ka shkruar në atë shkrim, nuk kam nevojë të gënjej e kam gjuajtur në koshin e plehrave, nëse doni të zgjasni këtë pyetje sa të doni rrimë këtu para trupit gjykues… Do të vdes me zhig me u zbulu se kush i ka pru ato dokumentacione, do të vdes me atë që nuk mund të zbulohet kush i ka pru ato dokumente. Të kisha ditë që letra çon peshë, qysh mendoni, një numër 7 dhe tre zero, nuk e kisha humb përjetë, do ta kisha pru këtu, kjo është e gjitha që po ju them”, ka thënë Gucati.
Prokurorja Bolici e ka pyetur Gucatin rreth deklarimeve të Nasim Haradinajt në konferenca për shtyp dhe emisione televizive, nëse ai pajtohet me ato çka janë thënë nga Haradinaj.
Lidhur me këtë, Gucati ka thënë se Nasim Haradinaj nuk ka përmendur emra apo deklarata të dëshmitarëve duke shtuar se i njëjti nuk ka gabuar në deklarimet e tij.
“Kjo është e saktë sa kemi të drejtë me lexu, keni të drejtë apo mundeni, unë nuk jam gjuhëtar por gjuhën shqipe e kuptoj dhe e di. Nuk dua ta mbroj Nasimin të jeni të bindur, se secili e mban barrën për vete, edhe Hysniu edhe Nasimi se nuk jemi të vogël por nuk dua ta mbroj Nasim Haradinajn por besoj që Nasim Haradinaj përderisa nuk ka përmend emër dhe deklaratë dhe ju tërhiqet vërejtja mediave që mos të bëni publike ashtu unë mendoj, por tek e fundit jemi të dytë në një bankë të të akuzuarit, kështu që unë mendoj që Nasimi nuk ka bërë vepër, unë mendoj ashtu”, ka thënë Gucati.
Gucati ka thënë se dokumentet e arritura në organizatë i kanë vendosur në tavolinë gjatë konferencave për shtyp por nuk i kanë shpërndarë ato dhe sipas tij kanë bërë thirrje që mos të publikohen emrat e dëshmitarëve.
“Ne i kemi lënë në tavolinë, ne vetëm kemi treguar kanë dalë disa dokumente nga Gjykata Speciale që për ne ka qenë një befasi, të dalin ato dokumente nga zyrat e juaja më përpara, tek ne thotë një fjalë e urtë popullore ‘e kisha mendu vdekjen sesa të dalin dokumentacionet nga ju’, kjo është fjalë popullore që përdoret tek ne, edhe unë po ju them më përpara kisha mendu të vdes pesë herë sesa të dalin këto dokumente të juaja dhe të na vijnë në zyrat tona. Këtë kush e ka bërë me qëllime të caktuara, apo pa qëllime, për me na qit neve në lajthitje ju e dini më mirë se ne”, ka thënë Gucati.
Në ditën e tretë të dëshmisë së tij në Hagë, Hysni Gucati ka thënë se Ushtria Çlirimtare e Kosovës nuk ka kryer vrasje ndaj qytetarëve serbë apo komuniteteve të tjera në Kosovë.
Gucati ka thënë se asnjëherë nuk ka kërcënuar ndonjë dëshmitarë përmes paraqitjeve publike apo ndonjë forme tjetër.
Hysni Gucati dhe Nasim Haradinaj u arrestuan më 25 shtator 2020 prej kur edhe po qëndrojnë në paraburgim në Hagë.
Rrjedhja e disa dokumenteve nga Specialja, të cilat nga një person ende i panjohur janë dërguar në zyrat e OVL-UÇK, dhe bërja publike e kësaj ngjarje nga krerët e organizatës, është arsyeja pse po gjykohen Hysni Gucati e Nasim Haradinaj.
Mbi ta rëndojnë akuzat për vepra penale kundër administrimit të drejtësisë, konkretisht për pengim të personave zyrtarë në kryerjen e detyrave zyrtare, për frikësim të dëshmitarëve, për hakmarrje dhe për shkelje të fshehtësisë së procedurës. /KP/
Të tjera
-
Hoxha policëve të rinj: Keni marrë vendim të drejtë, duke vënë vetën në shërbim të vendit
Drejtori i Policisë së Kosovës Gazmend Hoxha në ceremoninë e diplomimit të gj...
-
Ambasadori britanik, Hargreaves: Do të punojmë me Kosovën që vendimi në Komitet të Ministrave të jetë pozitiv
Ambasadori britanik në Kosovë, Jonathan Hargreaves, ka mirëpritur mbështetjen...
-
Kryeministri Kurti bën homazhe në Ditën e Dëshmorëve të Prishtinës
Kryeministri i Republikës së Kosovës, Albin Kurti, në Ditën e Dëshmorëve të P...
-
Ndryshimet e klimës do të ulin fort të ardhurat botërore
Studiuesit në Gjermani vlerësojnë se deri në vitin 2050 ndryshimi i klimës do...
-
Ambasada amerikane në Prishtinë: Nuk ka justifikim për dhuńën në familje dhe atë në baza gjinore, raportojeni
Ambasada e Shteteve të Bashkuara të Amerikës rikonfirmon mbështetjen për inst...
-
Szunyog kritikon sërish Qeverinë për Ligjin për Paga dhe për Zyrtarët Publikë: Nuk u mor parasysh BE-ja
Shefi i Zyrës së BE-së në Kosovë, Tomas Szunyog sërish ka kritikuar ekzekutiv...
-
Ndalimi i zëvendësdrejtorit dhe katër policëve në Serbi, Sveçla: Akt i paprecedent
Ministri i Punëve të Brendshme, Xhelal Sveçla e ka quajtur akt të paprecedent...
-
Haradinaj kujton të rënët e masąkrës së Makocit dhe betęjën e Marecit
Kryetari i AAK-së, Ramush Haradinaj, ka kujtuar Betejën dhe masakrat e Mareci...
-
Kurti: Vendit tonë do t’i shtohen edhe 445 policë të rinj, respektoni dhe nderoni uniformen
Kryeministri i Kosovës, Albin Kurti, në ceremonia e diplomimit të gjeneratës ...
-
445 policë të rinj i shtohen Kosovës
Është mbajtur ceremonia e diplomimit të gjeneratës së 59-të të Policisë së Ko...
-
Osmani në ceremoninë e diplomimit të kadetëve policorë: Tani jeni në mbrojtje të secilit qytetar të Republikës
Presidentja Vjosa Osmani ka marrë pjesë në ceremoninë e diplomimit të 446 kad...
-
Osmani: Pesë policë të Kosovës po mbahen mizórisht në Serbi, faktori ndërkombëtar të mos e injorojë këtë
Presidentja Vjosa Osmani ka marrë pjesë në ceremoninë e diplomimit të 446 kad...