Lajme

Grupi i Kumanovës në duart e një serbi, ja kush është ai

Autori: Gazeta inFokus 14:29 | 15 May 2017

Gjykata e Lartë do të shqyrtojë këtë javë kërkesën për ekstradim të ish-shefit të njësisë antiterror të Maqedonisë, Dejan Vuçoviç, shtetas serb nga Maqedonia, i cili u arrestua në Selanik, në shkurt të këtij viti në bazë të një urdhërarresti ndërkombëtar pasi ai ishte arratisur nga paraburgimi.

Ai ishte arrestuar në Shkup, i akuzuar për trafik armësh dhe droge, pasi në automjetin e tij të markës “Volvo” u gjet një granatë dhe më shumë se 800 gramë kanabis.

Edhe pse gjykata e Selanikut urdhëroi ekstradimin e tij, në bazë të kërkesës së dërguar prej autoriteteve maqedonase, Vuçoviç apeloi ndaj vendimit dhe tani pritet se çfarë do të vendosë Gjykata e Lartë, që do ta shqyrtojë apelimin të mërkurën.

-Advertisement-

Krahas apelimit, Vuçoviç, që po mbahet në burgun e Diavatas, ka bërë edhe kërkesë për azil politik në Greqi.

Ai pretendon që në rast të kthimit në Maqedoni, rrezikohet me tortura, madje dhe me vdekje.

30-vjeçari ka patur rol kyç në operacionin e zhvilluar në maj 2015 në një lagje të banuar nga shqiptarë, në qytetin e Kumanovës, ku njësi qeveritare zhvilluan për dy ditë luftime të ashpra me grupime të armatosura që u tha u përkisnin strukturave të ushtrisë Çlirimtare Kombëtare, UÇK.

“Në atë operacion kam qenë me detyrën e komandantit të njësisë së vendosjes së rendit”, shënon në kërkesën e tij drejtuar Gjykatës së Lartë, Vuçoviç.

Ai pretendon se integriteti i tij rrezikohet për shkak të situatës së trazuar në Maqedoni dhe zgjedhjes së politikanëve shqiptarë në poste të rëndësishme shtetërore, pasi Vuçoviç konsiderohet përgjegjës për vrasjen e luftëtarëve të UÇK në Kumanovë.

“Jam qytetar maqedonas, kristian ortodoks me origjinë serbe”, shkruan Dejan Vuçoviç në lutjen e tij, për gazëtën greke “Kathimerini”. /albeu.com/

Subscribe në YouTube: GAZETA INFOKUSI