Studimet i kreu për krejt diçka tjetër.

Anipse magjistroi për kontabilitet, punë nuk gjeti.

Marigona nuk u dorëzua, e nisi një biznes që e kishte hobi gjithmonë.

“Është hobi im dhe kam filluar dhe normal që është një masazh për krejt që nëse nuk mundesh me gjetë punë me diçka është mirë mos me u dorëzu, është mirë me vazhdu me hobi apo me diçka tjetër”, Marigona Syka, Pronare e “Fame Decor”, dhe përfituese e grantit nga “Syri i Vizionit”.

Biznesi që ka nisur po i ecën shumë mirë.

Organizimet dhe punët që kryhen aty i tregon vet Marigona.

“Këtë biznes e kam filluar qe një muaj. Biznesi quhet Fame Decor, merrem kryesisht me dekore për dasma, fejesa, ditëlindje. Bëjmë mbështjelljen e dhuratave të ndryshme dhe dekorimin e veturave. Në kuadër të këtij biznesi kam edhe disa produkte që janë: printimi në maica, printimi në gurë, printimi në pazzel, printimi në globe që janë më drita, poashtu ehe printimi nëpër pjata”, tha tutje ajo.

E për ta realizuar këtë ëndërr që gjithmonë e kishte hobi, asaj i ndihmoi Bashkimi Evropian në hapjen e biznesit të saj.

“Kam kryer disa trajnime që i kam mbajtur për fuqizimin e të rinjve dhe mbështetjen për gratë. Nga aty ideja ime është përzgjedhur dhe është përkrahur për blerjen e disa gjërave që më janë nevojitur për hapjen e këtij biznesi, normal e kam financuar edhe vet, kam blerë disa pajisje dhe kam filluar me këtë biznes”, u shpreh ajo.

Zyra e Bashkimit Evropian në Kosovë është mbështetësi kryesor financiar në këtë projekt duke përkrahur projektin me 85% ose 276, 607 euro të vlerës së përgjithshme të projektit 325,420 euro.

“Me grantet start-up për gratë, BE-ja mbështet fuqizimin e grave, krijimin e vendeve të punës dhe përfshirjen e tyre në sektorin privat. Zhvillimi i sipërmarrjes së grave është një përgjigje e zgjuar ndaj krizës aktuale ekonomike globale, dhe një përgjigje që ndihmon në një zhvillim te qëndrueshëm dhe gjithëpërfshirës. Gratë sipërmarrëse gjithnjë e më shumë po luajnë një rol vendimtar në zhvillimin ekonomik dhe social. 8 persona përfituan si start up në kuadër të këtij projekti, si pajisje ne vlerë deri në 3,500 EURO”, tha Majlinda Ferizi, Menaxhere e projektit në zyrën e BE-së në Kosovë.

Projekti ka mbështetur 21 biznese aktive si dhe 8 start up, komuna e Pejës se bashku me komunën e Istogut dhe Klinës kanë mbuluar 14% të buxhetit të projektit si bashkëfinancim.

Nga komuna e Pejës synojnë që ta rrisin këtë buxhet në mënyrë që edhe përkrahja të jetë më e madhe.

“Kemi qenë të hendikepuar, pjesa e subvencioneve ka qenë mjaftë e vogël, deri më tani s’ka pasur ku me ditë sa, ngase e gjithë komuna e Pejës i ka pasur të ndara 530 mijë euro të kategoria e subvencioneve, kjo na ka penalizuar që të mos kemi mundësi. Vitin e ardhshëm besoj që do të shkojmë mbi 800 mijë euro subvencione dhe pastaj kemi komoditet më të madh që të ndihmojmë këto kategori të caktuara”, tha Jeton Abazaj, drejtor i Financave në Komunën e Pejës.

Në komunën e Pejës janë afër 2,000 biznese të regjistruara nga pronare femra. (grafikë)

Ku numër për periudhën e parë të këtij viti krahasuar me atë të vitit të kaluar ka shënuar rritje.

“Në vitin e kaluar deri më 1 korrik kanë qenë 220 biznese të regjistruara ndërsa sipas statistikave në vitin 2022 është 240 numri i bizneseve të regjistruara për këtë vit, duke e marrë parasysh se diku rreth 8 mijë biznese janë në komunën e Pejës të regjistruara, prej tyre rreth 2 mijë janë të regjistruara nga pronare femra duke e marrë parasysh se diku 25% është regjistrimi i bizneseve të udhëhequra nga gratë”, Sami Gashi, Udhëheqës i Drejtorisë për Zhvillim Ekonomik në Komunën e Pejës.

Gratë e reja duhet marrë shembull suksesin e Marigonës.

Të gjithë bashkë duhet krijuar mundësi grave të reja, që të motivohen nga Marigona dhe ta zhvillojnë ëndrrën e tyre, pavarësisht sfidave.

87,5% e përfituesve të granteve për themelim të ndërmarrjeve të reja (start-ups) janë gra, si dhe 50% tjetër e përfituesve janë të rinj që përfituan nga grantet e projektit që u zbatua nga organizatat Syri i Vizioni, The Balkan Forum dhe Komuna e Istogut, me mbështetje financiare të Zyrës së BE-së në Kosovë.

Viva Fresh sjell programin XL: 10% zbritje gjatë gjithë vitit!

Sponsoruar