Lajme

Gruaja e Agim Ramadanit: Nuk guxonim të martoheshim, e kishim të ndaluar me ligj

Autori: Gazeta inFokus 18:34 | 12 April 2021

Shukrie Ramadani, gruaja e heroit Agim Ramadani, tha se vazhdon të jetojë me dhimbje duke shtuar se ëndrra e Agimit dhe të tjerëve për pavarësinë e Kosovës është arritur.

Përmes një rëfimi, ajo tregon se si është njohur me Agim Ramadanin edhe pse nuk guxonin të martoheshin, sepse e kishin të ndaluar me ligj.

“Nga klasa e parë njihemi me Agimin, jemi të të njëjtit fshat nga Zhegra e Gjilanit. Jemi rritur bashkë edhe në shkollë fillore edhe në të mesmën. Ishim ndër çiftet e pakta që e kemi pas të ndalur me ligj të martohemi. Agimi ka qenë i kërcënuar që në rast se martohet me mua do ta përjashtojnë nga Akademia Ushtarake, edhe unë isha e dënuar”, tha ajo në T7.

Shukrija tregoi se gjatë kohës sa Agim Ramadani ka qenë në Akademinë Ushtarake letrat ia kishte dërguar në emër të një gruaje serbe.

“Kur ja dërgoja letrat i shkruaja në emër të një serbeje që në shqip emri i saj nënkupton Yllka sepse e doja atë emër, derisa u kry Akademia Ushtarake ashtu i kam dërguar letrat”, shtoi ajo.

“Kur e kreu Akademinë Ushtarake, ditën e parë të dielë e planifikuam të martohemi…Për pesë vite sa isha e fejuar kam bërë shumë çejiz…Kemi pas vazhdimisht sfida të shumta. Pas Akademisë, ajo që mund t’i bënin Agimit ishte mosdhënia e gradave, banesës etj. Por e kishim njëri-tjetrin”, u shpreh ajo.

Teksa shtoi se më pas e kanë krijuar familjen, dy djemtë dhe një vajzë.

“Si e dënuar nuk kisha të drejtë të kisha pasaportë”, tha ndër të tjera.

Të tjera