Diana Kastrati, Zejnepe Bytyqi, Donjeta Pajaziti, Dafina Zhubi, e Sevdije Berisha janë vetëm disa nga viktimat për të cilat u kërkua drejtësi në protestën e së enjtes me moton “Marshojmë s’festojmë”, shkruan Infokusi.

Nga sheshi kryesor i Prishtinës u bënë thirrje për zbardhjen e vrasjeve të disa nga viktimave të vrara nga burrat në vitet e fundit në Kosovë.

Për shumicën nga to drejtësia ende nuk e ka thënë fjalën e fundit, për të vënë prapa grilave vrasësit.

-Advertisement-

Në mesin e pesë viktimave, katër nga to u vranë nga burrat, ish-burrat dhe të dashurit e tyre.

Diana Kastrati u vra në vitin 2011 në pikë të ditës disa metra larg shtëpisë së saj dhe i dyshuari për vrasjen e saj, ish-bashkëshorti Adnan Jashari, ende nuk është kapur nga organet e ndjekjes dhe drejtësisë kosovare.

Ajo u vra pasi kërkesa e saj për mbrojtje urgjente ndaj dhunës në familje nuk u pranua nga Gjykata e Prishtinës, shkruan Infokusi.

Emri i Dianës dhe grave tjera të vrara u thirr me zë të lartë nga protestuesit të enjten me qëllim që shoqëria të ndërgjegjësohet dhe që gratë e tjera të mos e kenë fatin e tyre.

Zejnepe Bytyqi është viktima tjetër nga Suhareka e vrarë pikërisht nga burri i saj, e cila tronditi opinionin.

Vrasja e saj erdhi pas shumë telasheve dhe rrahjeve, ku pas gjashtëmbëdhjetë viteve torturë e gjeti vdekjen në shtëpinë e saj.

Për vrasjen mizore të Zejnepes, vrasësi i saj u dënua me 12 vite burgim. Ky dënim u ngrit për disa vite më shumë vetëm pas protestave dhe presionit publik.

Ndërkaq, para dy viteve në mëngjesin e 17 shkurtit kishte mbetur e vratë 35 vjeçarja Dafina Zhubi, përkundër që nga ekspertiza  ndërkombëtare e vërtetoj se ajo u vra nga i dashuri i saj, ajo u raportua si e vetëvrarë.

Kjo ekspertizë ndërkombëtarë kishte vënë në dyshim prokurorinë e rastit, e cila kishte konstatuar vrasjen e saj si vetëvrasje.

Donjeta Pajaziti është vajza tjetër njëzetekatër vjeçare e cila u gjet e vrarë në bjeshkët e fshatit të saj, pas gjashtë jave kërkimesh pas zhdukjes së saj.

Për rastin e Donjetës fillimisht ka pasur një të dyshuar kryesor me të cilin lidheshin të gjitha provat, mirëpo pak ditë më parë ky i dyshuar u lirua nga akuza për vrasjen e saj.

Sipas vendimit të gjykatës, provat të cilat janë në dispozicion nuk janë në përputhje me viktimën.

Familja dhe tërë opinioni publik janë shokuar me këtë vendim të dhënë pasi është menduar se ky do të jetë rasti i parë, për të cilin drejtësia e ka dhënë verdiktin e saj ashtu siç duhet.

Pas gjithë këtyre vrasjeve, ishte vrasja tragjike e Sevdije Berishës nga Peja, ajo me tronditësja. Sevdija vdiq pasi u qëllua nga burri me sëpatë në kokë dhe pjesë të tjera të trupit. Ajo po flinte në kohën kur u qëllua me sëpatë.

Këto dhe shumë vrasje të tjera të grave në Kosovë po mbesin krime të fshehura ose të heshtura, për të cilat drejtësia nuk erdhi në vend asnjëherë./Infokusi.com

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-