Lajme

Gratë e suksesshme të Kosovës ftohen në Global Woman Summit

Autori: Gazeta inFokus 11:32 | 01 Qershor 2017

Linda Rama darkë për mysafirët e Global Woman. Të ftuara speciale janë edhe gratë nga Kosova. Global Woman, organizata tashmë e njohur në Londër dhe në gjithë botën e drejtuar nga shqiptarja Mirela Sula, e sjell Samitin e Grave këtë herë në Shqipëri.

Në datat 3-4 Qershor Tirana do të presë rreth 200 delegatë ku një pjesë e mirë janë mysafirë që po vijnë nga mbarë bota. Ndërkohë Mirela Sula ka konfirmuar se folëset dhe shumë delegate janë duke ardhur nga Amerika, Kina, Suedia, Anglia, Franca, Polonia, Zvicra, Hollanda, Serbia, India, Japonia, Peru dhe Kanada.

Linda Rama, bashkëshortja e kryeministrit të Shqipërisë Edi Rama do të hap samitin ditën e shtunë dhe njëkohësisht ajo ka ftuar në një darkë ekskluzive të gjithë mysafirët e ardhur nga jashtë, ditën e premte në Pallatin e Brigadave, raporton Zëri.info

-Advertisement-

Pjesë e kësaj darke dhe folëse në samit do të jetë edhe personazhi i njohur i filmit “Sekreti”, Marie Diamond, si dhe shumë të tjerë, burra dhe gra të suksesshme në biznes dhe fusha të tjera të jetës. Folësit nga Shqipëria janë Ministrja e Urbanistikës dhe Zhvillimit Eglantina Gjermeni, deputetja e PD Majlinda Bregu.

Në këtë event të këtyre përmasave nuk do të mungojnë as folësit nga Kosova ku do të jenë emra të spikatur të jetës publike si bashkëshortja e ish-kryeministrit të Kosovës Anita Haradinaj, Jehona Sopi, Rozafa Koliqi, Tina Hoti etj.

Dy ditët e samitit do të jenë plot përmbajtje cilësore ku do të flitet për sekretet e suksesit, vetëzhvillimin dhe motivimin që njerëzit kanë nevojë të aplikojnë në mënyrë që të ndryshojnë jetën e tyre dhe të arrijnë çfarë duan në jetë. /Zëri