Lajme

Glauk Konjufca cakton seancën e Kuvendit edhe pse nuk ka kuorum në kryesi

Autori: Gazeta inFokus 12:26 | 22 November 2021

Mbledhja e Kryesisë së Kuvendit që ishte paraparë të mbahet këtë të hënë nga ora 11:00 sërish nuk pati kuorum.

Mungesa e një anëtari të Listës Serbe dhe njëri të Lidhjes Demokratike të Kosovës dhe tjetri i Partisë Demokratike të Kosovës bëri që të mos ketë kuorum.

Por, kryeparlamentari Glauk Konjufca sërish caktoi seancën plenare të radhës që do të mbahet ditën e enjte duke filluar nga 10:00.

Shefja e Grupit Parlamentar të Lëvizjes Vetëvendosje, Mimoza Kusari-Lila, tregoi se cila do të jetë pika më e rëndësishme e seancës.

“Mbledhja e Kryesisë së Kuvendit prapë nuk ka pasur kuorum, përfaqësuesi i Listës Serbe dhe dy përfaqësues të partive opozitare LDK-së dhe PDK-së nuk ishin aty. Anëtari i sapozgjedhur i PDK-së kishte paralajmëruar mosardhjen derisa nuk kemi pasur përgjigje nga anëtari i LDK-së. Sidoqoftë sot Kryetari i Kuvendit komfor të drejtës së tij sipas Kushtetutës caktoi seancën plenare të radhës të Kuvendit me 25 nëntor duke filluar nga ora 10:00”.

“Pika më me rëndësi dhe më me peshë është ajo e shqyrtimit të Projektbuxhetit për vitin 2022 e cila pritet të jetë në trajtim në seancën e radhës” tha Kusari-Lila.

Të tjera