Lajme

Gjermania: Shpallja e organizatave terroriste në veri u bë pa koordinim me ne

Autori: Gazeta inFokus 12:28 | 30 June 2023

Pas ShBA-së, edhe Gjermania është deklaruar në lidhje me shpalljen e dy organizatave serbe si organizata terroriste nga qeveria e Republikës së Kosovës.

Zyra për shtyp e Ambasadës së Gjermanisë në Prishtinë, ka deklaruar se vendimi është marrë pa koordinim me Gjermaninë.

Madje thuhet se as Ambasada gjermane nuk është informuar për këtë veprim të qeverisë paraprakisht.
“Vendimi nuk është koordinuar as me Gjermaninë, madje as nuk është informuar qeveria gjermane nga autoritetet kosovare për këtë veprim paraprakisht”.

-Advertisement-

Në përgjigje thuhet po ashtu se duke qenë dëshmitarë të krizës aktuale në komunat veriore të vendit, “një koordinim i afërt me partnerët ndërkombëtarë do të kishte qenë i dobishëm”.

“Është e rëndësishme që çdo vendim i këtij lloji duhet të respektojë ligjet përkatëse dhe parimin e proporcionalitetit. Ritheksojmë thirrjen tonë për Qeverinë e Kosovës që të përmbahet nga çdo veprim i njëanshëm që mund të përshkallëzojë më tej situatën në komunat veriore”, ka theksuar Zyra për Shtyp e Ambasadës së Gjermanisë në Prishtinë për Klanin.

Ndërkaq, në njoftimin e vendimit për shpalljen e “Mbrojtjes Civile/Civilna zaštita” dhe komponentën e saj “Brigada e Veriut/Severna brigada” si organizata terroriste, Xhelal Sveçla, ministër i Punëve të Brendshme, tha se vendimi është marrë në koordinim me aleatët.

“Ne në vazhdimësi koordinohemi me të gjithë aleatët tanë, disa herë pajtohemi disa herë nuk pajtohemi. Patjetër që për ketë hap ne jemi koordinuar”, tha ai në konferencën e djeshme për media pas mbledhjes së qeverisë, ndërsa shtoi se me kohë do të ndajnë detaje të këtij procesi me partnerët strategjikë.

Subscribe në YouTube: GAZETA INFOKUSI