Lajme

Gërvalla takon Prevotin: Belgjika, mbështetëse e Kosovës në rrugën euroatlantike

Autori: Gazeta inFokus 12:39 | 14 Prill 2025

Ministrja në detyrë e Punëve të Jashtme dhe Diasporës së Kosovës, Donika Gërvalla, është takuar me ministrin e Jashtëm të Belgjikës, Maxime Prévot, me të cilin ka diskutuar për thellimin e bashkëpunimit bilateral dhe përkrahjen e mëtejshme të Belgjikës në proceset ndërkombëtare të Kosovës, shkruan Gazeta Infokus.

“Takimi me ministrin Prévot ofroi mundësinë ideale për të theksuar miqësinë e sinqertë dhe partneritetin e qëndrueshëm ndërmjet dy vendeve tona. E falënderova për mbështetjen e vazhdueshme të Belgjikës në procesin e shtetndërtimit të Kosovës dhe për rolin e saj të rëndësishëm në forcimin e pozitës ndërkombëtare të Republikës sonë,” shkroi Gërvalla në një postim në Facebook.

Ajo tha se bisedimet u fokusuan në zgjerimin e bashkëpunimit në fusha kyçe si drejtësia, arsimi, kultura dhe ekonomia. Gërvalla kërkoi gjithashtu përkrahjen e Belgjikës në avancimin e Kosovës drejt anëtarësimit në organizata ndërkombëtare, përfshirë Këshillin e Evropës.

-Advertisement-

Në këtë kuadër, ministrja theksoi rëndësinë e trajtimit të barabartë të Kosovës në forumet evropiane dhe thelbësinë që mbështetja për vendin të konkretizohet në veprime që nxisin integrimin evropian dhe euroatlantik të Kosovës.

“Belgjika ka qenë gjithmonë një zë i fuqishëm në mbështetje të drejtësisë, stabilitetit dhe vlerave demokratike në Ballkanin Perëndimor. Një rol të veçantë në marrëdhëniet tona e luan diaspora jonë në Belgjikë, e cila ka kontribuar ndjeshëm në forcimin e lidhjeve dypalëshe. Ka potencial të jashtëzakonshëm për të shfrytëzuar këtë urë të fortë përmes projekteve të përbashkëta kulturore, arsimore dhe zhvillimore,” tha ajo.

Ministrja Gërvalla përfundoi duke theksuar se Kosova mbetet e përkushtuar ndaj vlerave evropiane dhe euroatlantike, ndërsa Belgjika do të vazhdojë të jetë një aleate e rëndësishme në këtë rrugëtim të përbashkët.

Etiketa:
Comodita Home rikthen “Garage Sale” për edicionin e tetë, me zbritje deri në 70%
-Advertisement-

T� tjera

Fokusi

lajme

Ky website përdor cookies. Duke vazhduar përdorimin, ju pranoni përdorimin e tyre.

Privacy policy