Lajme

Gazeta spanjolle: Spanja do të bëjë kthesë historike në marrëdhëniet me Kosovën

Autori: Gazeta inFokus 13:42 | 20 Nëntor 2021

Qeveria e Pedro Sanchez po përgatit një kthesë historike në qëndrimin e Spanjës për Kosovën me një deklaratë që do të përfshinte njohjen de facto të pavarësisë së Kosovës.

Kështu shkruan gazeta spanjolle “The Objective”, duke iu referuar burimeve diplomatike, njofton Klan Kosova.

Siç shkruan kjo gazetë, mund të ndodhë hapja e një zyre tregtare apo kulturore në Prishtinë, por se Zyra për Informim Diplomatik në Spanjë në përgjigjen dhënë këtij mediumi ka thënë se këto opsione për momentin nuk janë në tavolinë.

-Advertisement-

Sekretari i Shtetit për Bashkimin Europian, Juan González-Barba, e bëri të qartë këtë të premte derisa ishte duke folur për proceset e zgjerimit në Ballkan se Spanja nuk do ta njohë diplomatikisht Kosovën përderisa nuk ka marrëveshje dypalëshe ndërmjet Prishtinës dhe Beogradit.

Numri tre i diplomacisë ka thënë se Spanja do që të jetë “më e përfshirë” në rajon dhe se kjo strategji do të ishte e çalë nëse Kosova vazhdon të injorohet “plotësisht”.

“Duhet të ketë një marrëveshje të caktuar kompromisi dhe aktualisht po shqyrtojmë modalitete të ndryshme pa i njohur shtetet anëtare”, tha ai, duke iu referuar Kosovës dhe duke peshuar secilën fjalë të tij para një auditori me diplomatë dhe ambasadorë ballkanikë, shkruan më tej gazeta.

González-Barba ka thënë se vendimi do të merret së shpejti, duke lënë të kuptohet se hapi diplomatik është afër.

“Ne duam që vendimi të kuptohet nga Serbia, partneri ynë kryesor në Ballkanin Perëndimor”, shtoi ai, duke e ditur se sa e nxehtë është kjo çështje në Beograd. “Ne duam të kontribuojmë në përpjekjet e të gjitha vendeve anëtare dhe të emisarit të BE-së, Miroslav Lajçak, për të arritur marrëveshje ndërmjet Beogradit dhe Prishtinës dhe shpresojmë që përpjekjet tona do të njihen dhe vlerësohen nga vendet e Ballkanit”.