Lajme

Fotografia e Ibrahim Rugovës ekspozohet me figura të shquara botërore në Slloveni

Autori: Gazeta inFokus 12:48 | 02 February 2022

Fotografia e ish-Presidentit të Kosovës, Ibrahim Rugovës, është ekspozuar bashkë me figura të shquara botërore në Ljubjanë të Sllovenisë

Kështu është bërë e ditur përmes një njoftimi nga Ambasada e Kosovës në Slloveni.

Në njoftim thuhet fotografitë e ekspozuar në ambientin e hapur në Lubjanë, janë të disa prej laureatëve të Çmimit Saharov për Lirinë e Mendimit të titulluar “Të Drejtat e Njeriut në Zemër të Evropës”.

-Advertisement-

“Nga më shumë se 40 personalitete dhe organizata ndërkombëtare laureatë të këtij çmimi prestigjioz, janë ekspozuar fotografitë dhe nga një përshkrim i shkurtër për veprimtaritë e disa prej tyre, duke përfshirë Presidentin e parë të Kosovës, Ibrahim Rugova”, thuhet në njoftim.

Në përshkrimin për Presidentin Rugova thuhet se, “Presidenti i parë i Kosovës së pavarur ka punuar parreshtur për zgjidhje paqësore dhe dialog dhe ia ka kushtuar jetën rezistencës jo të dhunshme të shqiptarëve të Kosovës kundër represionit serb. Ai njihej si “Gandi i Ballkanit” duke avokuar për konfirmim global të përpjekjeve të shqiptarëve të Kosovës për emancipim politik duke i bërë thirrje komunitetit ndërkombëtar që t’i ofrojë mbrojtje Kosovës”.

Çmimi Saharov për Lirinë e Mendimit është nderimi më i lartë i bërë nga BE-ja për punën për të drejtat e njeriut.

Në vitin 1991, laureat i parë i Çmimit Saharov nga Kosova ka qenë veprimtari i shquar dhe emblema e rezistencës, Adem Demaçi.

Subscribe në YouTube: GAZETA INFOKUSI