Lajme

Flet shoferi i linjës Kosovë – Gjermani që infektoi 11 veta me Coronavirus

Autori: Gazeta inFokus 10:18 | 02 April 2020

Shoferi i autobusit i linjës Kosovë – Gjermani, B. M. nga fshati Topanicë e Kamenicës, i cili rezultoi pozitiv me koronavirus të hënën, dyshohet se ka infektuar 11 banorë të fshatit.

Ai dyshohet se nuk ka respektuar rekomandimet e institucioneve të vendit për të qëndruar në vetizolim, pasi ishte kthyer nga Gjermania më 19 mars.

Në një bisedë telefonike me Insajderin, B. M. ka thënë se para se t’i shfaqeshin simptomat e COVID-it vetëm një herë kishte dalë nga shtëpia duke shpërfillur rekomandimin e institucioneve të shtetit për të qëndruar në vetizolim. Ai kishte shkuar në QKMF-në e Kamenicës.

-Advertisement-

“Kam dal vetëm një herë për të shkuar te mjekët në Kamenicë. Nuk kam dal nga shtëpia, vetëm shokët kanë ardhur për të më parë”, ka thënë B. M..

Ai thotë të mos jetë në dijeni se nga kush apo ku i është transmetuar sëmundja ngjitëse e koronavirusit. Por, thotë të ketë bartur rreth 80 udhëtarë si shofer i autobusit të linjës Kosovë-Gjermani. “Nuk e di. Rreth 37 udhëtarë i kam pasur për Gjermani, pastaj 40 të tjerë në linjën kthyese. Me të 13 mars kam shkuar për Gjermani dhe jam kthyer më 19 mars”, shprehet ai.

Nga kontaktet e tij me banorët e tjerë të fshatit janë infektuar edhe 11 banorë të tjerë të fshatit Topanicë. Lajmi u konfirmua të mërkurën nga Instituti Kombëtar i Shëndetësisë.

“Rastet pozitive janë raste kontakti, 11 prej të cilëve me vendbanim në Topanicë, një me vendbanim në Prishtinë dhe 1 me vendbanim në Gjakovë”, njofton IKShPK.

Infektimi i B. M. me epideminë COVID detyroi Komunën e Kamenicës të ndërmarrë masa në fshatin ku ai banonte, Topanicë. Ky fshat u vendos në karantinë më 30 mars.

Komuna e Kamenicës, po ashtu, ka dezinfektuar rrugët e fshatit të mërkurën.

Subscribe në YouTube: GAZETA INFOKUSI

Të tjera

Fokusi

lajme