Muzeu i Muzikës në Gjakovë është përfshirë nga një zjarr i madh, zjarrfikësit po punojnë për lokalizimin e tij dhe deri më tani nuk raportohet për persona të lënduar. Në këtë situatë, kryetari i Gjakovës Ardian Gjini është akuzuar nga zv.ministri i Zhvillimit Rajonal, Ali Tafarshiku, për “neglishencë ndaj këtij objekti” pasi sipas tij shkatërrimi ndodhi për me “ndërtu banesa”. Akuzave të Tafarshikut, i është përgjigjur Ardian Gjini në një prononcim për Gazetën Express.

Kryetari i Gjakovës, Ardian Gjini, tha se pjesa e mirë e kësaj ngjarje është se aty nuk ka pasur artefakte, pasi janë larguar më parë. Ndërsa, për akuzat e Tafarshikut për ndërtimin e banesave në atë zonë, Gjini tha se nuk ka mundësi për ndërtimin e banesave dhe kjo “është e palogjikshme”.

“Fillimisht është e papërgjegjshme edhe e turpshme me dhanë kushdoqoftë kësi deklarata palidhje, se e dimë që nuk ka mundësi me ndërtu banesa aty, do të thotë është e palogjikshme fillimisht. E dyta, më vjen keq çka ka ndodh, policia duhet me i kry hetimet dhe e treta artefaktet kanë qenë te hequra, do të thotë nuk ka pas artefakte aty kjo është pjesa e mirë e gjithë kësaj ngjarje. Nuk ka ekzistu asnjë artefakt se janë largu më herët, janë dërgu në Shkollë të Muzikës dhe në Muzeun Etnografik”, tha Gjini pasi u kontaktua nga Gazeta Express.

I pyetur nëse Komuna e Gjakovës ka pas plane për këtë Muze, ai tha se objekti ka qenë në procesin e dhënies me qira.

“Objekti ka qenë i dhënë me qira me herët, është dhënë me qira edhe vitin e kaluar mirëpo është shkëputë kontrata se qiramarrësi nuk i ka kry obligimet. Ka qenë në proces të dhënies me qira prap, ndërsa edhe njëherë po ju them artefaktet kanë qenë të hequra”, shtoi ai.

Tutje, ai tha se pretendimet për ndërtimin e banesave aty janë “aludime palidhje”.

“Këto pretendimet me ndërtu objekte, me të vërtetë këta njerëz janë çmendur, është e turpshme me aludu palidhje”, u shpreh ai.

Gjini tregoi se ka vizituar vendin e ngjarjes dhe është duke u punuar për lokalizmin e zjarrit.

“Unë deri para pesë minutash isha aty, janë duke punu besoj që lokalizohet zjarri. Policia i kryen hetimet dhe e gjen me siguri shkaktarin pasi të kryhen hetimet”, tha ai.

Sheremet Elezaj, zëdhënës i policisë Rajonale në Gjakovë, tha se nuk është raportuar për persona të lënduar.

“Mund të ju konfirmoj se Muzeu i Muzikës në Gjakovë është përfshirë nga zjarri.  Njësitet e nevojshme policore kanë dalë në vendin e ngjarjes si dhe Njesia e Zjarrëfikësve të cilët janë duke bërë përpjekje për lokalizimin e zjarrit. Nuk është raportuar për pasoja në njerëz”, tha ai për Express.

Lidhur me këtë rast, zv.ministri Ali Tafarshiku ka bërë edhe një postim të dytë.

Në profilin e tij në Facebook, ai ka ndarë një video të publikuar në muajin shkurt, ku kishte deklaruar se Komuna e Gjakovës “nuk janë të gatshëm të menaxhojnë asete të trashëgimisë kulturore dhe muzikore”.

“Paaftësia e qeverisjes lokale apo tendencat e individëve dhe grupeve për të përfituar nga Gjakova, bëjnë që edhe një aset tjetër si Muzeu i Muzikes “Tabhanja” ti nënshtrohet një ankandi publik, me gjasë si zakonisht për kafiteri apo restaurant”, ka shkruar ai.

Në vijim gjeni dy postimet e tij:

Policia jep detaje për zjarrin në Gjakovë, “Është duke u djegur Muzeu i Muzikës”

Fillon aplikimi për Global Engineer Girls Kosova

Sponsoruar