Lajme

Flamuri i Kosovës u “qëndisë” për herë të parë në Turqi

Autori: Gazeta inFokus 17:10 | 16 February 2018

Flamuri i Kosovës s’e ka pasur fatin të qëndiset nga ndonjë Marigo shqiptare, siç ishte qëndisur flamuri kombëtar. Penjtë e parë mbi pëlhurën e flamurit të shtetit më të ri në Evropë u endën nga gratë turke, shkruan AktivPress.

Pushteti në Kosovë ishte përkujdesur që ta mbajë në fshehtësi të plotë pamjen e këtij flamuri, ashtu siç e ruante në fshehtësi të plotë edhe Ditën e Pavarësisë. “Misioni” për t’i prodhuar flamujt për Ditën e Madhe, i ishte besuar firmës “Albayrak” të Turqisë. Kjo fabrikë ishte kontraktuar që t’i bënte gati hiq më pak se 30 mijë flamuj, ndonëse jo të gjithë ishin kërkuar për ditën kur do të shpallej pavarësia. Atë ditë duhej të ishin në Kosovë së paku tre mijë flamuj, të cilët duheshin shpërndarë nëpër institucione publike anë e kënd Kosovës.

Për pranimin dhe shpërndarjen e tyre ishin caktuar njerëzit, të cilët këtë mision duheshin ta kryenin pa e nxjerr sekretin jashtë. Por, pavarësisht se në Kosovë mbahej kjo fshehtësi, në Turqi kishte dalë sheshit gjithçka, shkruan AktivPress. Gazeta “Zaman” një ditë para shpalljes së pavarësisë së Kosovës bëri publike pamjen e flamurit dhe vendin ku po qëndisej. Lajmi ishte i bujshëm jo vetëm pse po lindte një shtet i ri, por për faktin se brenda atij shteti po i jepej peshë edhe komunitetit turk. Kjo pasqyrohej me yjet e flamurit. Njëri nga të gjashtët u dedikohej turqve të Kosovës.

-Advertisement-

Derisa në shtetin tjetër ishte nxjerrë lajmi për flamur, në Kosovë, të paktë ishin ata që e dinin si do të dukej simboli i shtetit, i dizajnuar nga Muhamer Ibrahimi. Misteri u zbardh me 17 shkurt 2008, kur atëbotë kryetari i Kuvendit, Jakup Krasniqi, pasi kishte marrë aprovimin e 109 deputetëve për ta shpallur Kosovën, shtet demokratik e të pavarur, kishte ftuar asistentin e tij, Ilir Gashi, për ta sjellë flamurin e shtetit brenda në Kuvend.

Iliri e kishte marr në dorë atë flamur një natë më herët dhe e kishte ruajtur që të mos e shoh askush deri në momentin solemn. E pasi e kreu me sukses misionin sekret, Gashi e mori flamurin me vete dhe e mbajti në shtëpi me vite rresht si një nga gjërat më të shtrenjta të tij.

Subscribe në YouTube: GAZETA INFOKUSI
Etiketa:
UFC EKSKLUZIVISHT NË ARTMOTION!
-Advertisement-

Të tjera

Fokusi

lajme