Neni 8 i Kushtetutës së Kosovës thotë se Kosova është “është shtet laik dhe neutral në çështje të besimeve fetare”.

E, megjithëse konsiderohet shtet laik më kushtetutë, në Republikën e Kosovës ka më shumë festa fetare sesa shtetërore.

Nga njëmbëdhjetë festat zyrtare të parapara për këtë vit, gjashtë janë festa fetare, ndërsa pesë janë festa shtetërore, shkruan gazeta inFokus.

Kur ditët e festave zyrtare të cekura në nenin 2 të këtij ligji bien ditën e shtunë ose të diel, ditë pushimi është edhe dita pasardhëse e punës, ashtu siç ndodhi edhe këtë të hënë pasi festa e Pashkëve Katolike ishte të dielën më 21 prill.

E njëjta gjë pritet të ndodhë edhe javën e ardhshme, pasi më 28 prill gjithashtu është festë zyrtare, pasi Ortodoksët festojnë Pashkët.

Pashkët Katolike, Pashkët Ortodokse dhe Bajrami i Vogël janë festat fetare që megjithëse me datë janë të dielën, ditë pushimi është e hëna.

Gjatë këtyre ditëve asnjë institucion shtetëror nuk punon.

Deputetët e Kuvendit të Kosovës konsiderojnë që Ligji për Festat Zyrtare në Republikën e Kosovës duhet të ndryshojë, pasi me këtë ligj, festat fetare dhe ato shtetërore llogariten njësoj.

Deputeti Nait Hasani nga Partia Demokratike e Kosovës, pati thënë se PDK-ja ka kërkuar ndryshimin e ligjit me rekomandimin për të zvogëluar numrin e festave zyrtare dhe harmonizimin e ligjit me standardet e Bashkimit Evropian.

“Tani kemi festat fetare te cilat janë shndërruar në festa shtetërore. Festat fetare duhet të jenë festa fetare e jo shtetërore, sepse Kushtetuta e përcakton shtetin laik e jo fetar”, pati thënë Hasani.

E, deputetja Arbërie Nagavci nga Lëvizja Vetëvendosje, po ashtu ka thënë se ligji duhet të ndryshohet.

Ajo theksin e vuri në faktin se institucionet pushojnë edhe një ditë pas festave, duke thënë se po shfrytëzohet rasti që institucionet të pushojnë duke i vazhduar ditët e pushimit edhe pas festave.

“Ligji duhet të rishikohet, nuk është e arsyeshme të kemi një numër kaq të madh të ditëve të pushimit dhe sidomos të shfrytëzohen rastet e tilla për shtimin e ditëve kur nuk punohet në institucione publike, qoftë duke i lidhur festat, siç ka pasur raste jo të rralla, pra kur festa ta zëmë bie ditën e enjte, institucionet pushojnë edhe të premten, apo nëse festa bie të martën, nuk punohet as të hënën”, pati thënë Nagavci.

Në bazë të ligjit për festat zyrtare ditët e festave zyrtare janë ditë të lira me pagesë për të gjithë punëtorët e Kosovës, përveç kur është e rregulluar ndryshe me ligje tjera.

Një ditë pune gjatë festave zyrtare kompensohet me një ditë e gjysmë pushimi ose në kundërvlerë në para, shkruan gazeta inFokus.