Sport

‘Fadil Vokrri’, gati për ta bërë historinë

Autori: Gazeta inFokus 12:00 | 20 November 2018

E marta do të jetë historike për përfaqësuesen e Kosovës në futboll. Përballja me Azerbajxhanin nga ora 20:45 në kuadër të Ligës së Kombeve, do të përcaktoi fatin e “Dardanëve” në rrugëtimin drejt Evropës.

Por, është ndeshja e parë që Përfaqësuesja e Kosovës, do ta zhvillojë në stadiumin ‘Fadil Vokrri’ në kohën e dimrit. Test ky për Federatën e Futbollit të Kosovës për të dëshmuar para UEFA-s se gjithçka është në rregull me stadiumin e vetëm të licencuar për ndeshje ndërkombëtare.

Zëvendës Sekretari i Federatës së Futbollit të Kosovës, Arianit Ahmeti ka deklaruar për gazetën inFokus se përkundër motit të ftohtë që po mbretëron në vend, gjithçka ëshët gati për ndeshjen.

-Advertisement-

“Kemi bërë të gjitha përgatitjet për ndeshjen, gjithçka është në funksion, jemi duke u kujdesur për secilin detaj, dhe presim që gjithçka të jetë konform rregullave”, është shprehur Ahmeti.

Ai tregon se po monitorohet gjithçka, në mënyrë që mos të ketë ndonjë lëshim eventual.

“Të gjithë sektorët e stadiumit janë në funksion dhe ne vazhdimisht jemi duke e përcjellë situatën që të evitojmë çdo problem eventual”, ka thënë Ahmeti për gazetën inFokus.

Ai është i bindur se ndeshja në të cilën vlerësohet se Kosova ka gjasa të mira për t’u kualifikuar tutje, në gjysmëfinale të kësaj lige nuk do të ketë telashe.
Në bazë të rregullave, ‘Dardanët’ do të mund të kualifikohen për më tutje në Ligën e Kombeve, duke mos pësuar humbje nga ekipi mysafir. Pra fitorja dhe barazimi e dërgon Kosovën tutje.

Ndërkohë ekipi mysafir do të mund të kalonte më tej vetëm më një fitore eventuale ndaj djelmoshave të Kosovës.

Këtë ndeshje do ta drejtojnë gjyqtarët francez në krye me gjyqtarin kryesor, Benoit Millot, asistent të tij do të jenë, Mehdi Rahmouni , Bertrand Jouannaud, asistentët prapa portave, Frank Schneider, Karim Abed. Kurse gjyqtar i katërt do të jetë, Benjamin Pages.

Kujtojmë që Përfaqësuesja e Kosovës është i vetmi ekip në Ligën e Kombeve pa asnjë humbje.

Interesimi për ketë ndeshje është jashtëzakonisht i madh nga kosovarët, ku vetëm për pak kohë janë shitur të gjitha biletat për duelin e nesërm. /Gazeta inFokus.

Autori: Granit KOCI

Subscribe në YouTube: GAZETA INFOKUSI