Lajme

“Ëndërrat e tij u ndalën në gjysmë”, Drejtoresha e Arsimit në Malishevë me telegram ngushëllimi për 12 vjeçarin që vdiq sot

Autori: Gazeta inFokus 17:40 | 18 September 2024

Drejtoresha e Arsimit në komunën e Malishevës i ka dërguar telegram ngushëllimi familjes së 12 vjeçarit që vdiq sot.

Ai ishte nxënës në shkollën “Hilmi Hoti” në Carrallukë.

“Blearti do të na mungojë të gjithëve por ne nuk do ta harrojmë kurrë shëmbëlltyrën e tij prej nxënësi dhe çiltërsinë e tij dhe dashurinë e tij për shkollën.”

-Advertisement-

Telegrami i plotë:

E nderuara familje Krasniqi dhe personeli arsimor e nxënësit e SHFMU “Hilmi Hoti” në Carrallukë.

 Më lejoni që në emër të  nxënësve dhe personelit arsimor të komunës së Malishevës, të  shpreh ngushëllimet më të thella për ndarjen nga jeta të nxënësit tonë Bleart Bekim Krasniqi nxënës i klasës së 8-të në SHFMU” Hilmi Hoti” në Carrallukë.

I trishtë ishte lajmi për vdekjen e Bleartit,  i cili na tronditi të gjithëve për ndarjen nga jeta në lulen e rinisë. Ne kishim nevojë për buzëqeshjen e tij në shkollë, shokët dhe shoqet e klasës së tij  dhe bashkëmoshatarët e tij  kishin ende nevojë për lojën e tij dhe ngrohtësinë e tij që ai çdo ditë dhuronte për shoqërinë e tij.

Ne kishim nevojë që ëndrrat e Bleartit të vazhdonin të jetonin e ai të shtegtonte me buzëqeshjen e tij të ngrohtë drejt mësimeve të reja, drejt njohurive të reja së bashku me shoqërinë e tij. Por ja që ëndërrat e tij  u ndalën në gjysmë edhe ai nuk do të jetë më në mesin tonë, të hapërojë drejt dyerve të ngrohta të shkollës e diturive të reja.

Blearti do të na mungojë të gjithëve por ne nuk do ta harrojmë kurrë shëmbëlltyrën e tij prej nxënësi dhe çiltërsinë e tij dhe dashurinë e tij për shkollën.

Qofshin të paharruara kujtimet për Bleartin,

Lavdi veprës së tij jetësore!

Me respekt,

Arbëreshë Krasniqi

Drejtoreshë e  Drejtorisë për Arsim dhe Edukim  në Malishevë.

Subscribe në YouTube: GAZETA INFOKUSI
BKT Kosova dhe Komiteti Olimpik i Kosovës nënshkruajnë vazhdimin e marrëveshjes së sponsorizimit për periudhë 10-vjeçare
-Advertisement-

Të tjera

Fokusi

lajme