Lajme

Elbasan: Lirohen nga paraburgimi “spiunët” rusë

Autori: Gazeta inFokus 23:15 | 25 May 2023

Gjykata e Shkallës së Parë në Elbasan, i ka liruar nga paraburgimi dy shtetasit rusë, Mikhail Zorin e Svetlana Timofeeva, si dhe shtetasin ukrainas, Fedir Alpatov, meqë ka përfunduar koha e qëndrimit të tyre në këtë masë.

Të tre ata akuzohen për spiunazh, megjithëse mbrojtja e tyre ka pretenduar vazhdimisht se ata janë vetëm blogerë.

Megjithatë hetimet për akuzat e ngritura ndaj tyre do të vazhdojnë.

Sipas njoftimit, ndaj Mikhail Zorinit është caktuar masa e sigurimit personal “Arrest në shtëpi”, ndërsa ka urdhëruar të njëjtin të mos largohet nga banesa.

Për personin tjetër nën hetim, ukrainasin Fedir Alpatov, masa e re e caktuar është “Detyrimi për t’u paraqitur në Policinë Gjyqësore” të hënën e parë të çdo muaji në orën 10:00 si dhe caktimin e masës së sigurimit personal “Ndalimi i daljes jashtë shtetit” duke ia bllokuar pasaportën dhe kartën e identitetit këtij shtetasi.

Ndërkaq, për personin e tretë nën hetim, shtetasen ruse Svetlana Timofeeva, gjykata ka caktuar masën e detyrimit për t’u paraqitur në Policinë Gjyqësore të hënën e parë të muajit në orën 10:00, si dhe masën e bllokimit të pasaportës dhe kartës së identitetit të saj.

Svetlana Timofeeva, 33 vjeçe nga Rusia, u arrestua më 20 gusht të vitit 2022, së bashku me dy shtetas të tjerë, Mikhail Zorin, 23 vjeç nga Rusia, dhe Fedir Aplatov nga Ukraina, pasi tentuan të hynin në ambientet e uzinës së armëve në Gramsh dhe hodhën sprej neuro-paralizues ndaj dy ushtarëve që po e ruanin këtë objekt ushtarak.

Ata u kapën duke fotografuar uzinën e Gramshit, ndërsa në sendet personale të tyre u gjetën disa materiale të disa pikave të rëndësishme që njihen si infrastrukturë kritike ushtarake në Shqipëri.

72 pjesëmarrës nga 41 Universitete të Evropës bashkohen në Kosovë në ditën e Evropës

Të tjera

Fokusi

lajme