Lajme

Eksplozivi i futur në aeroplan ishte test

Autori: Gazeta inFokus 16:04 | 29 November 2017

Menjëherë pas përfundimit të testit i cili ka pasur për qëllim matjen e sigurisë në ANP, ministri i Punëve të Brendshme dhe ekspertët e kësaj fushe, i kanë prezantuar drejtorit të Aeroportit Ndërkombëtar të Prishtinës “Adem Jashari” (ANP) dhe atij të Agjencisë së Shërbimit të Navigimit Ajror të Kosovës (ASHNA), të gjitha të gjeturat nga testi, si dhe të gjitha rekomandimet e dhëna nga Departamenti për Siguri Publike-MPB. Me këtë rast të dy subjektet kanë ndërmarrë veprime konkrete të menjëhershme përkitazi me të gjeturat e këtij testi.

Për sqarim të opinionit, testi ka qenë i fokusuar tek kapacitetet e ANP-së dhe ASHNA-së, që nënkupton pajisjet dhe përgjegjësitë e stafit civil në fushën e sigurisë, në kuadër të ANP-së dhe pjesës së sistemit të ASHNA-së.

Testet bëhen pa paralajmërim paraprak, me qëllim të testimit të sistemit të sigurisë dhe të procedurave me qëllim të identifikimit të mangësive të mundshme, mospërputhshmërive ose çështjeve në mënyrë që të ndërmerren masa të menjëhershme korrigjuese. Këto teste realizohen në përputhje me standardet ndërkombëtare.

-Advertisement-

Ne do të vazhdojmë që t’i aplikojmë këto teste ashtu siç parashihet me ligj dhe për interes të sigurisë nacionale dhe asaj publike. Dëshirojmë t’i falënderojmë të gjithë ekspertët e sigurisë të cilët kanë ndihmuar në planifikimin, zbatimin dhe analizimin e rezultateve dhe ne presim që të gjitha palët e përfshira t’i zbatojnë ato menjëherë.

Ministria e Punëve të Brendshme në bazë të përgjegjësive ligjore, mbetet e përkushtuar në implementimin e të gjitha standardeve të parapara, në aspektet e sigurisë në Aeroportin Ndërkombëtar të Prishtinës “Adem Jashari” dhe ju njofton që përgatitja, realizimi, raportet dhe rekomandimet për testet infiltruese janë konfidenciale dhe kjo është arsyeja që nuk janë bërë publike.

MPB siguron qytetarët e Republikës së Kosovës, se tani Sistemi i sigurisë në Aeroportin Ndërkombëtar të Prishtinës “Adem Jashari” dhe në Agjencinë e Shërbimit të Navigimit Ajror, është brenda standardeve të parapara.

Subscribe në YouTube: GAZETA INFOKUSI