Profesori dhe eksperti i tregjeve financiare, Florin Aliu, ka vlerësuar se çmimet e produkteve në Kosovë janë shumë më të shtrenjta se në shumë vende të rajonit.

Ai ka bërë me dije se këto çmime në Kosovë shkojnë deri në 60 për qind më shtrenjtë se në vendet e tjera.

Gjatë një interviste në “Interaktiv”, Aliu ka thënë se derisa në shumicën e vendeve të BE-së inflacioni ka filluar të stabilizohet, në Kosovë nuk po ndodh një gjë e tillë.

-Advertisement-

“Shumica e shteteve të Eurozonës janë në një inflacion 1 apo 0.5 për qind, vetëm Letonia është me gjashtë për qind. D.m.th burimet e importimit të inflacionit kanë filluar të stabilizohen atje, ndërsa këtu kemi akselerim edhe më të madh të çmimeve. Qysh është e mundshme kjo? Cili është shpjegimi për këtë?”, ka thënë ai, duke dhënë detaje tjera.

“P.sh., unë kam parë, jam dëshmitar i shumë produkteve që i kam konsumuar, ato produkte në Kosovë shiten me 50 për qind, nganjëherë edhe me 60 për qind më shumë. Si është e mundur kjo? Nuk mendoj se është kostoja e transportit sepse ti një herë e transporton. Në BE pagat janë më të larta, qiraja është më e lartë, energjia elektrike është më e shtrenjtë, gazi është më i shtrenjtë, taksat janë më të larta. Te kostot operative kryesisht janë këto. Atëherë si është e mundur që ne kemi çmime më të larta”, është shprehur ai.

Ai ka bërë me dije se edhe rritja e shtesave nga Qeveria ka mundur të ndikoi në rritjen e inflacionit.

“Hamendësimi im është ky, mund të jenë shumë faktorë brenda, mirëpo, unë e dëgjova një faktor që është i pasaktë, pra transferet që janë bërë, skemat sociale që janë rritur, shtesat e këto, pra paraja direkte që ka ardhur te qytetarët përmes skemave të Qeverisë ka mundur ta akselerojë inflacionin, është e pasaktë për një arsye shumë të thjeshtë”, ka thënë ai, duke treguar se pse ndodh kjo.

“Ai lloj inflacioni që vjen prej parasë, vjen kur shtypen shumë para në treg dhe ka më pak produkte. Kosova është rasti i kundërt, ne përdorim euron por nuk jemi pjesë e Eurozonës. Ka mungesë të parasë në qarkullim. Ti i dëgjon dhe sheh shumë biznese që punojnë me kompenzime. Çka nënkupton kjo? Kjo tregon se ka mungesë të parasë në qarkullim”, është shprehur ai.

Udhëto Oslo – Prishtinë çdo javë me PrishtinaTickets

Sponsoruar

-Advertisement-