Saktësisht 31 ditë pasi që shqiptoi 21 vjet burg ndaj katër aktivistëve të Lëvizjes Vetëvendosje të akuzuar për sulmin në Kuvendin e Kosovës, Gjykata Themelore e Prishtinës ka përpiluar aktgjykimin e plotë lidhur me këtë rast.
KALLXO.com ekskluzivisht ka siguruar aktgjykimin dhe arsyetimin që dënoi aktivistët e Vetëvendosjes.

Në aktgjykimin prej 41 faqesh përshkruhen provat materiale, provat rrethanore, provat shfajësuese dhe pretendimet e të akuzuarve dhe mbrojtësve të tyre.

Gjyqtari Beqir Kalludra që ka përpiluar aktgjykimin ka listuar provat mbi të cilat e ka mbështeture aktgjykimin duke filluar nga motoçikleta e djegur, komunikimet mes të akuzuarve, kartela e blerë e telefonit dhe provat e tjera relevante.

-Advertisement-

“Motoçikleta e gjetur duke u djegur, po ashtu është vërtetuar se atë motoçikletë e kanë blerë dhe drejtuar të akuzuarit Atdhe dhe Egzon dhe të njëjtën e kanë përdor për kryerjen e veprës penale”, thuhet në aktgjykim.

Po ashtu lidhur me këtë provë që në aktgjykim renditet si kruciale, gjykata përmend edhe dëshminë e dëshmitarit Heset Ramadani.

“Gjykata vlerëson se nga kjo provë materiale vërtetohet fakti që pikërisht motoçikletën të cilën tani dëshmitari Heset Ramadani u ka shitur të akuzuarve Atdhe dhe Egzon është motoçikleta e cila është gjetur e djegur pas kryerjes së sulmit në Kuvendin e Kosovës. Pasi dëshmitari Heset ka qenë në gjendje të sigurojë dokumentet e personit në emër të cilit ka qenë motoçikleta paraprakisht dhe atë në emër të personit Sahit Hasani nga i cili edhe e ka blerë tani dëshmitari Heset Ramadani ndërsa siç vërtetohet nga fotoalbumi i datës 5 gusht 2016, gjegjësisht fotografitë 15, 16,17, dhe 18 është numri i njëjtë i shasisë”, arsyetohet në aktgjykim.

Ndër provat materiale të vlerësuara, sipas gjykatës, përmenden edhe incizimet e marra nga kamerat e sigurisë së ETC-së.

“Në video-incizimet e marruar nga kamerat e sigurisë të vendosura në pjesën e jashtme të ETC-së, shihet se i akuzuari Atdhe Arifi është duke drejtuar një motor me ngjyrë të kuqe ndërsa që në një distancë të afërt qëndron në këmbë tani i akuzuari Egzon Haliti ndërkaq që vetura e tani të ndjerit Astrit Dehari është e parkuar afër në skaj të rrugës”, përshkruan aktgjykimi.

Si provë tjetër materiale lidhur me këtë rast, gjykata renditi edhe video-incizimet e kamerave ku prokuroria pretendon se duket Adea Batusha duke blerë telefonin.

“Gjykata vlerëson se nga këto incizime të administruara në cilësinë e provave materiale vërtetohet bindshëm fakti që e akuzuara Adea Batusha me datë 5 gusht 2016 ka blerë telefonin dhe të njëjtin ia ka dërguar tani të akuzuarit Frashër Krasniqi nga i cili telefon më pastaj është dërguar e-maili me përmbajtje si më lartë”, përshkruhet në aktgjykim.

Në aktgjykim, më tej arsyetohet se përpos video-incizimeve ketë pretendim e mbështesin edhe deklaratat e dëshmitarëve.

“Kjo provë material është në përputhje edhe më dëshminë e dëshmitarit Naser Mustafa i cili ka përshkruar tani të akuzuarën Adea Batusha në mënyrë të njëjtë si dhe shfaqet në video-incizimet e marra gjatë rrugëtimit të saj deri në vendin ku e blenë telefonin dhe largimin e saj në drejtim të vendbanimit të akuzuarit Frashër Krasniqi e po ashtu edhe kohën kur kjo e akuzuar e ka blerë telefonin, kiflen që e ka pasur në dorë, syzet, çantën”, përshkruhet në aktgjykim.

Përpos dëshmitarit, Mustafa, gjykata përmend edhe dëshminë e dëshmitarit Zogiani.

“Njashtu edhe me dëshminë e dëshmitarit Remzi Zogiani i cili e ka identifikuar të akuzuarën Adea si personin që në ditën kritike e ka dërguar deri te banesat e Tregtisë e po ashtu edhe rrugën që e ka përshkruar me rastin e dërgimit deri në këtë adresë”, thuhet në aktgjykim.

KALLXO.com gjatë ditës do të sjellë edhe arsyetimin e aktgjykimit lidhur me provat rrethanore, provat shfajësuese si dhe me vlerësimin e mbrojtjes së të akuzuarve lidhur me këtë rast.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-