Fokus

Ekskluzive: Hamdi Hoxha ngrit padi për shpifje ndaj ish drejtorit të ATK-së, Ilir Murtezaj (DOKUMENT)

Autori: H. Smajli 14:44 | 09 November 2020

Zëvendës Drejtori i Administratës Tatimore të Kosovës, ka ngritur padi për shpifje në Gjykatën Themelore në Prishtinë, ndaj drejtorit të shkarkuar para dy javësh të ATK-së, Ilir Murtezaj.

E gjithë kjo erdhi pas një konference për media, ku Murtezaj e akuzonte Hoxhën për favore e afera në ATK.

Në padinë e tij ndaj Murtezajt, Hoxha kërkon kompensim të dëmit moral për shpifje dhe fyerje.

Po ashtu në këtë padi Hoxha ka thënë se shpifjet ndaj tij janë bërë me qëllim të viktimizimit dhe mbulimit të shkeljeve ligjore që i ka bërë vetë Murtezaj.

Gazeta inFokus ka siguruar dokumentin e padisë në të cilin thuhet se “Sipas ligjit në fuqi, Ligji nr.02/L-065, neneve 14 dhe 15 është paraparë kompensimi për shpifjen dhe fyerjen në rastet e shkaktimit të dëmeve ndaj reputacionit të paditësit, si pasojë e shpifjeve dhe fyerjeve të të paditurve dhe mos kërkimi i faljes. Nga ajo që u citua më lartë shifet qartë se paditësit, nga i padituri i është shkaktuar dëm moral për shkak të cenimit të dinjitetit personal dhe familjar”, thuhet në padi.

Kujtojmë se para dy javësh, Ilir Murtezaj pasi u shkarkua nga detyra e Drejtorit të ATK-së me vendim të qeverisë së Kosovës, e menjëherë pas këtij vendimi, ai përmes një konference për media dha akuza të shumta për Hoxhën e po ashtu edhe për kryeministrin e Kosovës, Avdullah Hoti si dhe ministres së financave, Hykmete Bajrami./Gazeta Infokus/

Të tjera