Lëvizja Vetëvendosje e Qendrës në Podujevë, ka reaguar pas përplasjes së Kryetarit të Komunës së Podujevës, Shpejtim Bulliqi, me asamblistin e Lidhjes Demokritike të Kosovës, Ekrem Rrahmani.

Përmes një postimi në faqen e tyre zyrtare, kanë shkruar se në seancën e sotme të Kuvendit Komunal, Rrahmani ka tentuar ta sulmojë fizikisht Bulliqin, i cili sipas tyre, në cdo seancë ka sjellje të njëjtë ndaj këshilltarëve të partisë së VV-së.

Kjo përplasje u raportua se ndodhi për shkak të një mosmarrëveshjeje lidhur me asamblistin, Demokrat Hodolli, njëherit anëtar i Komisionit për Komunitete, ku sipas reagimit të VV-së, thuhet se Rrahmani ka eskaluar në fyerje ndaj Bulliqit, derisa i është “ofruar në foltore për ta sulmuar kryetarin”.

“Asamblisti i LDK-së, Ekrem Rrahmani, tenton ta sulmojë kryetarin e Komunës, Shpejtim Bulliqi Këshilltari komunal i LDK-së, Ekrem Rrahmani, asesi nuk po mund të edukohet. Ai në seancën e sotme të Kuvendit Komunal tentoi edhe ta sulmojë fizikisht kryetarin e Komunës, z.Shpejtim Bulliqi. Asamblistët e kësaj partie e veçmas Ekrem Rrahmani, pothuajse në secilën seancë të Kuvendit vazhdon me fyerje e sjelllje prej rrugaçësh si ndaj këshilltarëve të partisë tonë, po ashtu edhe ndaj kryesuesit të Kuvendit. Ndërsa, sot shkoi përtej kësaj duke tentuar edhe ta sulmojë fizikisht Kryetarin Bulliqi. Meqenëse dështoi propozimi i tyre, Kryetari Bulliqi për t’i dhënë zgjidhje kësaj kërkese, propozoi që për këtë çështje të kërkojnë përgjigje nga MAPL-ja se si të veprojnë rreth anëtarit të Komitetit për Komunitete. As kjo nuk u mjaftoi dhe Ekrem Rrahmani, eskaloi në fyerje ndaj Kryetarit dhe këshilltarët e LDK-së e penguan edhe rrjedhën e seancës. Ndërkohë, Ekrem Rrahmani shkoi në foltore për ta sulmuar Kryetarin Bulliqi”, thuhet në reagimin e VV-së.

Ndër të tjerash, në postimin e tyre bëhet e ditur se Bulliqi e ka paraqitur rastin në Polici për “tentim sulm fizik” ndaj tij.

“Sjellja e asamblistëve të LDK-së, e veçmas e Ekrem Rrahmanit, përveçqë është e papranueshme, tejkalon çdo sjellje njerëzore. Siç është parë përgjatë këtyre tre vjetve të këtij mandati, ai të vetmin “argument” e ka arrogancën, fyerjen e sjelljen prej një rrugaçi të papërmirësueshëm. Përfaqësues të tillë, nuk i bëjnë nder jo vetëm Kuvendit Komunal, por as partisë që e përfaqëson”, thuhet në përfundim të reagimit.