Edhe vëllai i deputetit pre e mashtrimit për pushime ‘përrallore’ në Turqi
Autori: Gazeta inFokus
09:45 | 27 August 2018
Valentin Quni, vëllai i deputetit të LDK-së në Kuvendin e Kosovës Anton Qunit, është njëri nga viktimat e kompanisë mashtruese “Vol Travel” nga Gjilani. Ky dhe plot qytetarë të tjerë kanë paguar aranzhime me çmime të lira për t’i kaluar pushimet verore në bregdetin turk, por kompania në fjalë ua ka marrë atyre më shumë se 80 mijë euro dhe nuk u ka ofruar shërbime fare, shkruan Gazeta “Zëri”.
Të joshur përmes ofertave të lira për t’i kaluar pushimet verore në bregdetin turk shumë qytetarë nga e gjithë Kosova kishin rezervuar aranzhimet në kompaninë nga Gjilani “Vol Travel”, e cila në vazhdimësi promovonte çmime thuajse 50% më të lira sesa kompanitë e tjera që operojnë në vendin tonë. Por, në momentin kur ata është dashur të fluturojnë drejt Turqisë nga personeli i aeroportit ndërkombëtar “Adem Jashari” kanë mësuar se rezervimet e tyre ishin bërë vetëm në letër, ku edhe janë detyruar të kthehen më pastaj në shtëpi dhe më pas të paguajnë edhe një herë shuma të konsiderueshme të mjeteve për të udhëtuar drejt Turqisë.
Pas ankesës së qytetarëve Policia e Kosovës, respektivisht Drejtoria për Hetimin e Krimeve Ekonomike dhe Korrupsionit në Prishtinë, kishte nisur hetimet ndaj kompanisë në fjalë e ku edhe përfaqësuesi i saj Granit Leka kishte mbyllur zyrat dhe për disa ditë kishte ikur nga Kosova. Por, në momentin e kthimit ai është arrestuar nga Policia, ku edhe është duke u mbajtur në paraburgim.
Zëdhënësi i Policisë në Gjilan, Ismet Hashani, thotë se disa qytetarë janë lajmëruar në stacionin policor në Gjilan që kanë dëshmuar se janë viktimë e kompanisë në fjalë. “Janë 2-3 qytetarë që kanë hapur rast në stacionin policor”, ka thënë Hashani për gazetën “Zëri”. Edhe kryeprokurori i Gjilanit Jetish Maloku ka konfirmuar se disa qytetarë kanë rënë viktime e kësaj kompanie, mirëpo siç ka thënë ai gjatë tri javëve të fundit është në pushim vjetor dhe nuk ka shumë informacione të detajizuara rreth rastit në fjalë.
“Të hënën (sot) u jap informacione më të hollësishme rreth rastit në fjalë”, ka thënë kryeprokurori Maloku nëpërmjet telefonit.
Quni kishte paguar 3300 euro
Nga viktimat e kompanisë mashtruese “Vol Travel” është edhe Valentin Quni, vëllai i deputetit të Lidhjes Demokratike të Kosovës (LDK) Anton Qunit.
I kontaktuar nga gazeta “Zëri” Quni konfirmon se është njëri nga viktimat e shumta të kompanisë mashtruese. Ai tregon se për ofertën joshëse për t’i kaluar pushimet verore në Turqi kishte mësuar përmes ofertave të prezantuara në rrjete sociale. Ai tregon se kur ka parë ofertën ka kontaktuar përmes telefonit në numrin e shfaqur në ofertë, ku në fillim ka kërkuar të dijë nëse oferta në fjalë është ende valide. “Kam biseduar me një djalë, të cilin e pyeta se a ka vende të lira në ofertën që ai ka prezantuar. Ai menjëherë ma konfirmoi se ka vende të lira, ku unë kërkova nga ai që t’i rezervojë 9 vende të lira, atij i thashë se paratë po ia dërgoj përmes llogarisë bankare. Mirëpo ai më tha se paratë duhet t’i jepen në dorë”, rrëfen Quni.
Ai më tutje thotë se për disa ditë nuk iu lajmërua fare, derisa pas një kohe ai sërish tregoi se e ka marrë në telefon personin tashmë të arrestuar. “E thirra sërish dhe e pyeta nëse kanë mbetur vende të lira. Ai më tha se më lajmëron pas pak. Pas nja 2 orësh më thirri në telefon tha se ka vende të lira, por është obligative që pagesa të kryhet sot. Unë pas telefonatës shkova në Gjilan tek ai në zyre, ku aty pashë edhe prindërit e tij. Ai nisi t’i plotësojë biletat dhe më tha që duhet pak kohë. Unë dola jashtë zyrës dhe ika të ha bukë. Kur u ktheva ai kishte kryer të gjitha procedurat. Unë ia pagova 3300 euro për 9 persona”, rrëfen më tutje Quni për gazetën “Zëri”.
Pagoi dy herë pushimet
Më tutje Quni tregon se së bashku me familjen e tij ishin bërë gati për të udhëtuar drejt Turqisë, por që në momentet e fundit ai ka mësuar se ka rënë viktimë e kësaj kompanie. “Ishim duke pritur në radhë, por kur na erdhi radha aty e kuptuam nga personeli i Aeroportit që biletat tona figurojnë vetëm në letër. Menjëherë tentova të kontaktoj me personin që ia kam dhënë paratë, ai kishte shlyer ‘Viber’-in dhe kishte ndalur telefonin. Provova edhe disa numra të tjerë, kur më vonë m’u lajmërua nëna e djalit, e cila ma tha se është tejet e shqetësuar se nuk ka informata se ku ndodhet djali i saj. Unë i thashë që ne kemi mbetur në Aeroport, por asaj nuk i bëri përshtypje kjo gjë”, tregon më tutje Quni.
Ai më tutje thotë se ka shkuar edhe në Gjilan, por atë nuk e ka gjetur në zyrën e tij, ku dhe më pastaj është lajmëruar në Polici, ku ka treguar se ka rënë viktimë e kësaj kompanie mashtruese.
Quni më tutje tregon se përveç tij edhe shumë qytetarë të tjerë kanë rënë viktimë e kësaj kompanie mashtruese. “Disave ua ka marrë të gjitha paratë dhe nuk i ka dërguar fare në Turqi, disave ua kishte marrë paratë, atyre ua ka paguar vetëm biletat e avionit, por jo edhe hotelin, disave ua ka marrë paratë dhe ua ka paguar hotelin për një ose dy net. Kishte raste të ndryshme të mashtrimeve. Pas gjithë këtyre mundimeve jam detyruar të paguaj edhe një herë pushimin”, ka deklaruar më tutje ai.
Gazeta ka provuar të kontaktojë në numrin e telefonit të kësaj kompanie, por edhe pas disa përpjekjesh kontakti më ta ka qenë i pamundur.
Dëmi, mbi 80 mijë euro
Jozyrtarisht nga burime brenda Policisë thuhet se dëmi që u është shkaktuar qytetarëve dyshohet se është mbi 80 mijë euro, por duke u bazuar në deklaratat e qytetarëve shuma e dëmit rezulton të jetë shumë më e madhe.
Para arrestimit të Granit Lekës Policia e Kosovës, respektivisht Drejtoria për Hetimin e Krimeve Ekonomike dhe Korrupsionit në Prishtinë, kishte njoftuar përmes një komunikate për medie se është duke i trajtuar disa ankesa të qytetarëve të Kosovës, të cilët kishin bërë aranzhime turistike për verën e vitit 2018 në agjencinë turistike “Vol Travel” me seli në Gjilan. “Këto aranzhime turistike dyshohet se nuk janë realizuar nga agjencia e lartpërmendur, prandaj ftojmë të gjithë qytetarët e Republikës së Kosovës të cilët kanë bërë aranzhime turistike me agjencinë në fjalë e të cilat aranzhime nuk janë realizuar të paraqiten në Drejtorinë për Hetimin e Krimeve Ekonomike dhe Korrupsionit në Policinë e Kosovës në nivel të regjioneve përkatëse policore ku ata banojnë”, thuhej në komunikatën e Policisë.
Aty më tutje Policia e Kosovës kishte paralajmëruar se do t’i ndërmarrë të gjitha veprimet e nevojshme hetimore dhe operacionale për identifikimin dhe arrestimin e të dyshuarve të përfshirë në raste të tilla të mashtrimeve, ku dhe njëkohësisht ka kërkuar nga të gjithë qytetarët që të jenë të kujdesshëm, të mos bien pre e mashtrimeve të tilla, të informojnë dhe të bashkëpunojnë me Policinë e Kosovës për parandalimin e këtyre rasteve.

T� tjera
-
E rëndë në Prizren: 26-vjeçarja ndërron jetë pasi iu përkeqësua gjendja gjatë intervistimit nga hetuesit e antidrogës
Një 26-vjeçare ka ndërruar jetë në Spitalin e Përgjithshëm të Prizrenit, pasi...
-
Mustafa: Qeveria e Kosovës pranoi se ka blerë energji elektrike nga Serbia, qytetarët meritojnë përgjigje për dimrin
Deputeti i Partisë Demokratike të Kosovës (PDK), Arben Mustafa, ka reaguar pa...
-
Sillet në Gjykatë 26-vjeçarja e arrestuar për trafikim të narkotikëve, në rastin ku dyshohet edhe ish-ministri Astrit Haraqija
Një 26-vjeçare, e arrestuar nën dyshimin për trafikim të narkotikëve në grupi...
-
Kraki “godet” Kurtin: Paskemi blerë rrymë nga Serbia dhe prapë kemi mbetur pa rrymë, dy herë dështim
Deputeti i VV-së, Nezir Kraki ka reaguar pasi Qeveria e Kosovës ka marrë vend...
-
Daut Haradinaj: Përgjegjës për krizën energjetike është shefi, jo ministrja Rizvanolli
Daut Haradinaj, ka reaguar pas paralajmërimit të kryeministrit Albin Kurti pë...
-
“Qeveritë Kurti 1, 2 e 3 kanë qenë UDB-asha, këta të katërtit janë patriotë”- Sadiku ironizon pas vendimit për tregtimin e rrymës me Serbinë
Deputeti i Lidhjes Demokratike të Kosovës (LDK), Ermal Sadiku, ka reaguar me ...
-
Osmani: Ky pushtet i largoi miqtë, nesër mund të ketë goditje edhe më të rënda për Kosovën
Deputetja e Lidhjes Demokratike të Kosovës, Vjosa Osmani tha se Kosova po e p...
-
Astrit Haraqija sot del para Gjykatës, flet avokati i tij
Ish-ministri i Kosovës, Astrit Haraqija, është arrestuar ditën e djeshme në k...
-
Rryma në dimër, Rizvanolli: Po përpiqemi maksimalisht që kostot e furnizimit të mos rriten
Ministrja e Ekonomisë, Artane Rizvanolli ka folur për mundësinë e rritjes së ...
-
Çitaku: Keqardhja e komisioneres Kos nuk mjafton, kërkojmë sqarim, kërkimfalje dhe garanci për mospërsëritje
Ushtruesja e detyrës së kryetares së PDK-së, Vlora Çitaku, ka reaguar pas dek...
-
Ymeri-Qeverisë: E konfirmuat se kishte tregti të energjisë me Serbinë, por jeni shumë vonë ta nxirrni Kosovën nga kjo “fajde”
Deputetja e LDK-së, Janina Ymeri ka reaguar menjëherë pasi Qeveria Kurti 4 ka...
-
Bajrami për ndërprerjen e tregtimit të rrymës me Serbinë: Tash po shiten si patriotë
Deputetja e LDK-së, Hykmete Bajrami, ka reaguar pas vendimit të Qeverisë së K...

































