Lajme

Edhe një dorëheqje nga AAK-ja pas rezultateve të dobëta në zgjedhje

Autori: Gazeta inFokus 10:43 | 23 February 2021

Pas përfundimit të zgjedhjeve nga Aleanca për Ardhmërinë e Kosovës kanë filluar dorëheqjet, kjo për shkak të rezultateve të dobëta.

Gjatë ditës së martë përmes një letër ka dhënë dorëheqje kryetari i degës së AAK-së në Gjilan , Agim Zuzaku, shkruan Gazeta Infokus.

“Pas çdo procesi zgjedhor, nëse ka rezultate të mira duam t’i marrim meritat, por duhet marrë përgjegjësinë edhe për këto rezultate shumë zhgënjyese.Nuk ka funksionu shtabi, të rinjtë janë keqmenaxhu me ose pa qëllime të caktuara. Jam munduar të ruaja unitetin nëpër nëndegë dhe në degë, shumë gjëra jam munduar të mos i shihja e kuptoja për të vetmin qëllim; ndoshta po bëjmë diçka mirë e po arrijmë sukses, por jo”, ka shkruar ai.

Sipas Zuzakut niveli qendror nuk i ka kryer obligimet për vëzhguesit.

“Kulmi i gjith procesit ishte kur niveli qendror nuk i ka kryer obligimet për vezhguesit, duke më lënë në pozitë më të palakmueshme të jetës sime.Duke u bazuar ne të gjitha këto, unë marr përgjegjësinë për këtë situatë dhe e shoh të arsyeshme t’ua hap rrugën të tjerëve, që nënkupton se nga sot nuk do të jem kryetar i degës së Aleancës… dhe gjithashtu jap dorëheqjen nga të gjitha funksionet politike që kisha deri tani në AAK”, ka shkruar ai.

Kujtojmë që të hënë ka dhënë dorëheqje nga AAK-ja edhe Rasim Selmanaj.

AAK-ja në këto zgjedhje ka marrë 7.4% të votave të qytetarëve me drejtë vote./Gazeta Infokus/

Të tjera

Fokusi

lajme