Një tjetër veturë luksoze e tipit “Audi A7”, që dikur ishte në pronësi në Hysri Peqanit (Burdushit), i është dhënë për shfrytëzim ministrit të Bujqësisë, Faton Peci.

Sipas burimeve të Front Online, vetura në fjalë ende nuk është duke u përdorur nga ministri Peci për shkak se ajo duhet të regjistrohet në emër të Ministrisë së Bujqësisë.

“Makina Audi A7 e Burdushit i është dhënë Pecit, por ende nuk e shfrytëzon sepse duhet të regjistrohet në emër të Ministrisë së Bujqësisë”, ka thënë ky burim për Front Online.

-Advertisement-

Front Online ka kontaktuar direkt ministrin Faton Peci por ai nuk e ka hapur telefonin, dhe as nuk i është përgjigjur mesazheve të shumëta që i kemi dërguar.

E-mail u është dërguar edhe këshilltarëve politikë të ministrit Peci, por as ata nuk kanë kthyer përgjigje.

Ngjashëm kanë  vepruar edhe nga zyra për Informim pranë kësaj Ministrie.

Përgjigje nuk kanë kthyer as nga Agjencia për Administrimin e Pasurisë së Sekuestruar dhe të Konfiskuar anipse këta të fundit përmes një e-maili kërkuan që pyetjet t’ua adresojmë nëpërmjet zyrës për komunikim në Ministrinë e Drejtësisë.

Front Online ka siguruar fotografitë ekskluzive të veturës me ngjyrë të bardhë “Audi A7”, e cila ka disa ditë që po qëndron e parkuar në garazhet e Ministrisë së Bujqësisë në Prishtinë, të cilën së shpejti do ta marrë në shfrytëzim ministri Peci, pasi të regjistrohet, njejtë siç ka vepruar ministri i Brendshëm, Xhelal Sveçla, me veturën “Range Rover”, poashtu pronë e konfiskuar e mjekut popullor Hysri Peqani-Burdushi.

 

 

Vetura e tipit “Audi A7” është në mesin e tri veturave që Agjencia për Administrimin e Pasurisë së Sekuestruar ose të Konfiskuar ia mori Burdushit.

Hysri Peqani, i njohur si “Burdushi”, ishte dënuar me dënim unik prej 4 vjet e 6 muaj burgim dhe 42 mijë euro gjobë lidhur me akuzën për ushtrim të kundërligjshëm të veprimtarisë mjekësore ose farmaceutike, mashtrim, shpëlarje parash dhe armëmbajtje pa leje, e të cilin dënim më 30 qershor 2023 e kishte vërtetuar edhe Gjykata e Apelit.

Atij iu konfiskua pasuria në vlerë mbi 2 milionë euro.

Një xhip Range Rover, një Renault Megane RFB dhe një Audi A7 ishin veturat luksoze që shteti ia mori Burdushit.

Veturat tani u morën në shfrytëzim nga dy ministra të Qeverisë “Kurti”.

Front Online ka raportuar se vetura e tipit LAND Range Rover e konfiskuara nga Agjencia për Administrimin e Pasurisë së Sekuestruar ose të Konfiskuar po shfrytëzohet nga ministri i Punëve të Brendshme, Xhelal Sveçla dhe ministria e tij për nevojat e tyre.

Këtë lajm e kanë konfirmuar edhe nga Ministria e Punëve të Brendshme (MPB) duke treguar se e kanë në shfrytëzim veturën e lartpërmendur dhe se ajo po përdoret për nevojat e Ministrisë.

“MPB për shkak të mungesës së veturave, ka kërkuar nga Agjencia dy vetura dhe kërkesa jonë është aprovuar për një veturë që tashmë është në përdorim nga Ministria, sipas dispozitave të parapara ligjore”, thuhet në përgjigjen e tyre për Front Online.

Nga kjo Ministri thonë se në të njëjtën formë edhe veturat e tjera të konfiskuara u jepen institucioneve të ndryshme të shtetit.

“Mallrat të cilat sekuestrohen nga Agjencia për Administrimin e Pasurisë së Sekuestruar dhe të Konfiskuar të përfituara nga veprat të ndryshme penale, krimit të organizuar, kontrabandës etj, pas sekuestrimit u jepen në shfrytëzim institucioneve të ndryshme, sipas nevojës dhe kërkesës së institucionit. Në të njëjtën formë edhe shumica e veturave të cilat janë sekuestruar u jepen për përdorim Policisë së Kosovës, Ministrive si dhe institucioneve të ndryshme, varësisht nga kërkesat dhe nevojat”, thuhet më tej në përgjigjen e MPB-së për Front Online.

 Hysri Peqani, i njohur si “Burdushi”, nuk ka shkuar ende në vuajtje të dënimit me burgim, pasi nga Gjykata Themelore në Prishtinë, më 10 janar 2023, ishte dënuar me dënim unik prej 4 vjet e 6 muaj burgim dhe 42 mijë euro gjobë lidhur me akuzën për ushtrim të kundërligjshëm të veprimtarisë mjekësore ose farmaceutike, mashtrim, shpëlarje parash dhe armëmbajtje pa leje, e të cilin dënim më 30 qershor 2023 e kishte vërtetuar edhe Gjykata e Apelit.

Gjykata Themelore në Prishtinë më 21 gusht 2023, e ka urdhëruar “Burdushin” që më 18 shtator 2023, deri në orën 12 të paraqitet në Shërbimin Korrektues të Republikës së Kosovës, në Qendrën e Paraburgimit në Prishtinë, për të filluar mbajtjen e dënimit me burgim.

Në këtë urdhëresë, thuhet se nëse i dënuari nuk vepron sipas urdhëresës, përkatësisht nëse në ditën e caktuar nuk paraqitet në Institucionin për mbajtjen e dënimit, gjykata do të lëshojë urdhëresë për ndalim dhe dërgim me forcë për mbajtjen e vuajtjes së dënimit./Front Online/

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-