Lajme

E v*rau gruan, Apeli e vërteton dënimin me burg të përjetshëm për Edmond Lajçin

Autori: Gazeta inFokus 15:51 | 09 June 2025

Gjykata e Apelit ka vërtetuar dënimin me burgim të përjetshëm për Edmond Lajqinin, i cili më 16 prill 2024 vrau bashkëshorten e tij, Gjyljeta Ukella.

Kjo gjykatë ka refuzuar ankesën e palës mbrojtëse, duke konfirmuar vendimin e Gjykatës Themelore në Pejë, shkruan Gazeta Infokus.

Sipas komunikatës së lëshuar nga Gjykata e Apelit, aktgjykimi i shkallës së parë është vlerësuar si i rregullt dhe pa shkelje të dispozitave ligjore. Lajqini është shpallur fajtor për veprën penale të vrasjes së rëndë, sipas nenit 173 paragrafi 1 pika 1.3 të Kodit Penal të Kosovës, si dhe për mbajtje të paautorizuar të armëve, sipas nenit 366 paragrafi 1 të po të njëjtit kod.

-Advertisement-

Në dënimin e shqiptuar, i është llogaritur koha e kaluar në paraburgim që nga data e krimit. Gjithashtu, është konfiskuar arma me të cilën është kryer vepra penale – një pistoletë e tipit “Zoraki 917-T” me karikator dhe pesë fishekë – e cila do të shkatërrohet pas hyrjes në fuqi të aktgjykimit.

Gjykata e Apelit thekson se pretendimet ankimore nuk qëndrojnë, pasi gjykata e shkallës së parë ka vërtetuar në mënyrë të drejtë dhe të plotë faktet, provat personale e materiale, si dhe pranimin e fajësisë nga vetë i akuzuari. Po ashtu, nuk janë gjetur rrethana që do ta përjashtonin përgjegjësinë penale apo ndjekjen ndaj tij.

“Kolegji gjykues konsideron se me shqiptimin e dënimit me burgim të përjetshëm arrihet qëllimi i dënimit: parandalimi i përsëritjes së veprave penale, rehabilitimi i kryerësit, parandalimi i të tjerëve nga kryerja e veprave të ngjashme, kompensimi për viktimat apo komunitetin, dhe shprehja e gjykimit shoqëror ndaj veprës penale”, thuhet në vendim.

Subscribe në YouTube: GAZETA INFOKUSI