“Të hënën me 11 korrik është shpallur lista (e përfituesve) dhe isha e befasuar, e tronditur dhe e zhgënjyer me faktin që një numër tejet i vogël prej OJQ-ve dhe mediave të përzgjedhura për përkrahje financiare janë organizata me bazë në komunitetet”, shkruan Elizabeth Gowing, në letrën të cilën e ka siguruar Albanian Post, dhe e cila i ishte adresuar kryeministrit të Kosovës, Albin Kurti, ku njoftohet edhe dorëheqja nga zyra për Komunitete e britanikes, pasi ankesat e saj për parregullsitë e konkursit nuk u morën parasysh.

Gowing tregon në letrën e saj se kishte kërkuar që OJQ-të përfituese të jenë me bazë në komunitete.

“Kam kontrolluar në regjistrin publik të OJQ-ve për konfirmim nëse OJQ kanë në fushëveprimin e tyre diçka që lidhet me komunitet”, ndërsa shton se me shpalljen e listës së përfituesve ka nxjerrë dëshmi që nuk janë të përfshira OJQ me bazë në komunitete; “prej 42 OJQ-ve të përzgjedhura me listën preliminare kam gjetur vetëm 3 shembuj që janë me një bazë të tillë, sipas emrave në listë dhe regjistrit”.

-Advertisement-

“I kam shkruar kryeministrit që ta ma sqarojë nëse qëndron një listë e tillë, duhet të jap dorëheqje nga puna ime me Zyrën për Çështje të Komuniteteve. Kam punuar intensivisht në terren për më shumë se një vit dhe me partnerë të shumtë për të krijuar besim në ZCK prej të gjitha komuniteteve joshumicë dhe një listë nga Zyra ku propozohet të ndahet gjysmë milion euro tek përfitues të tillë nuk është diçka që mundem ta mbroj para komuniteteve”.

Ndërkaq, ajo tregon se një ditë pas kësaj është mbajtur një takim me zyrën ligjore në kuadër të zyrës së kryeministrit, së bashku me Sekretarin e Përgjithshëm dhe Kryetrarin e Komisionit që ka vlerësuar aplikimet në thirrje, si dhe me një zyrtar nga kabineti i zëvendëskryeministres Emilja Rexhepi.

“Kemi kërkuar opinionin ligjor nëse ka bazë për anulimin e konkursit në rrethana siç janë, me rezultate që nuk i përshtaten qëllimit të ZCK-së. Opinioni është dërguar më vonë gjatë javës që vetëm Komisioni për Ankesa ka të drejtë për anulimin e thirrjes”.

“Ky komision është thirrur nga Sekretari i Përgjithshëm dhe i përberë nga shërbyes civil dhe kështu kam prit vendimin e tyre. Sot më janë dërguar rezultate të mbledhjeve të Komisionit për Ankesa dhe mbasi nuk është anuluar thirrja, po shkruaj tash në vazhdim të mesazhit që ia kam dërguar kryeministrit më 11 korrik që nuk mund të vazhdoj të punoj në Zyrën për Çështje të Komuniteteve”.

Gowing bënë me dije se do të vazhdojë që të qëndrojë me “kënaqësi dhe krenari me punë të mia të tjera si Këshilltare e Kryeministrit për Çështje të Komuniteteve për koordinimin e punës së institucioneve për implementimin e politikave që mbrojnë dhe promovojnë të drejtat dhe interesat e komuniteteve jo shumicë në Kosovë”.

“Deri tash kam krijuar shumë mundësi të reja që zëri i komuniteteve të dëgjohet drejtpërdrejtë nga kryeministri, por edhe nga Ministrat dhe vendimmarrësit e tjerë”, thuhet ndër të tjera në letrën e britanikes drejtuar Kurtit.

Tutje, këshilltarja e kryeministrit tregon edhe momentin kur Kurti e kishte ftuar që të bëhet pjesë e kabinetit të tij, dhe përgjegjësitë që i kishte caktuar.

“Kur kryeministri më ka ftuar të bashkëngjitëm në kabinetin e tij, njëra nga përgjegjësitë që më ishte dhënë ishte mbikëqyrja e përkohshme e Zyrës për Çështje të Komuniteteve (ZÇK), derisa rregullohet baza ligjore për shpallje konkurs publik për një Drejtor të zyrës që nuk do të jetë i emëruar politikisht”.

“Qëllimi është që të kemi sa më shumë transparencë në punën e Zyrës mbas problemeve të të kaluarit, të identifikuarit nga auditet dhe të kem qasja proporcionale për të gjithë komunitete joshumicë në përkrahje të ZÇK-së”.

Ajo ka shpjeguar edhe si ka pasur konsultim të gjerë me komunitete, madje me më rreth 1 qind e 50 persona.

“Në fillim të këtij viti kam udhëhequr një konsultim të gjerë me komunitetet – mbi 150 persona kanë marrë pjesë në takim në Zoom dhe në dy takime live – bashkë me ZCK që të identifikojmë prioritetet e komuniteteve për programin e ZCK-së për këtë vit në bazë të saj kam punuar për Programin e Zyrës, bashkë me Zyrtarin Ligjor për ZCK që është emërtuar nga Sekretari i Përgjithshëm si përgjegjës i zyrës”.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-