Lajme

Dokumentari i Serbisë kundër Kosovës në UNESCO, premierë në Paris

Autori: Gazeta inFokus 11:20 | 15 September 2017

Prishtinë, 15 shtator – Në Qendrën Kulturore të Serbisë në Paris sot (e premte) do të jepet premiera botërore e filmit dokumentar “Kosova – moment në civilizim”, i autorit Boris Malagurski. Ashtu siç e citojnë mediat serbe njoftimin, shfaqja bëhet në kuadër të fushatës së gjerë të shtetit serb kundër anëtarësimit të Kosovës në UNSCO. I pranishëm në këtë ceremoni do të jetë edhe drejtori i asaj që quhet Zyra për Kosovë e Metohi, Marko Gjuriq.

Nëse i gjithë dokumentari është në frymën e “trailerit” të lansuar në muajin gusht, autoritetet serbe kanë zgjedhur vepër propagandistike. Inserti prej 1 minutë e 25 sekondash hapet me një lloj krahasimi midis shqiptarëve dhe pjesëtarëve të ISIS-it. Nis me pamjet kur i ashtuquajturi Shteti Islamik i shkatërron tempujt antikë. Më pas ngrihet pyetja: “A e keni ditur se kjo po ndodh edhe në Evropë?” Shfaqjen pamjet e trazirave të vitit 2004.

“Shfaqja dhe promovimi i këtij filmi, realizimin e të cilit e ka bashkëfinancuar Zyra për Kosovë e Metohi pranë Qeverisë së Serbisë, ka për qëllim që përfaqësuesve të korit diplomatik në Paris, e në veçanti ambasadorëve të vendeve të tjera në UNESCO t’ua prezantojë trashëgiminë kulturorë serbe në Kosovë e Metohi, dhe është një pjesë e fushatës së gjerë të shtetit serb kundër pranimit të Kosovës në UNESCO”, thuhet në një komunikatë për media që është publikuar në mediat serbe.

-Advertisement-

Në bazë të raportimeve, pas shfaqjes do të mbahet edhe një tribunë “për trashëgiminë kulturore serbe në Kosovë e Metohi, në të cilën, krahas autorit të filmit, do të flasin edhe ambasadori i Serbisë ne UNESCO, Darko Tanaskoviq, dhe drejtori i Zyrës për Kosovë e Metohi, Marko Gjuriq” (gjerësisht, sot në “Kohën Ditore”).