Lajme

Doktorët në veri protestojnë kundër taksës

Autori: Gazeta inFokus 16:19 | 30 November 2018

Këtë javë veriu i Mitrovicës ka qenë i vërshuar nga protestat e serbëve.

Gjatë ditës së premte, punëtorët e institucioneve shëndetësore nga veriu i vendit kanë vazhduar protestën kundër vendimit të Qeverisë së Kosovës për vënien e taksës prej 100 për qind ndaj produkteve serbe.

Sipas tyre, Prishtina ua ka marr serbëve më themeloren dhe më të duhurën, ushqimin, ilaçet dhe të drejtën e lirisë.

-Advertisement-

Protestuesit përveq me flamuj të Serbisë kishin edhe mbishkrime në duar në gjuhën serbe e angleze ‘EU hapi sytë’, ‘Stop dhunës nga Prishtina’, ‘Duam paqe jo luftë’.

Protesta u mbajt në oborrin e spitalit në veri të Mitrovicës. Drejtori i spitalit, Millan Ivanoviq, e ka quajtur situatën aktuale për serbët në Kosovë jashtëzakonisht të vështirë, e cila tha se duhet të zgjidhet vetëm me unitet dhe bashkim të të gjithë serbëve.

Ai e ka quajtur Kosovën një shtet të brishtë, ndërsa ka potencuar heqjen e taksave, lirinë dhe lirimin e të akuzuarve të fundit, si kërkesa themelore të serbëve.

Sipas tij, Prishtina po tenton t’i destabilizojë serbët në mënyrë që të ikin dhe ta braktisin Kosovën.

Zëvendësdrejtoresha e Shtëpisë së shëndetit në veri të Mitrovicës, Milena Nikoliq, tha se serbët sot të qetë qëndrojnë dhe luftojnë për mbijetesë.

Ndryshe, protesta e sotme që zgjati rreth një orë ishte e qetë, ndërsa përveç prezencës së kryetarëve në dorëheqje të komunave veriore dhe disa deputetëve serbë të Parlamentit të Kosovës, ishin ftuar edhe disa nga ish futbollistët e njohur nga Beogradi si Dragan Xhajiq, Mitar Mërkela, si dhe drejtori i klubi Cërvena Zvezda, Zvezdan Terziq.

Subscribe në YouTube: GAZETA INFOKUSI