Lajme

Diskutohet roli i Inteligjencës Artificiale në sigurinë kombëtare

Autori: Gazeta inFokus 07:51 | 15 October 2024

Qendra Amerikane për Luftimin e Ekstremizmit dhe Terrorizmit (ACCET) sot në Prishtinë mban debat mbi temën “Roli i Inteligjencës Artificiale (IA) në Luftën Kundër Terrorizmit dhe Sigurinë Kombëtare: Përdorimi dhe Keqpërdorimi i IA-Sfidat dhe Pasojat e Teknologjive të Avancuara”.

Debati do të mbledhë së bashku ekspertë të shquar për të diskutuar ndikimin e IA-së në sigurinë kombëtare dhe përpjekjet kundër terrorizmit, me fokus të veçantë në sfidat etike, ligjore dhe ato që lidhen me privatësinë, të cilat sjellin teknologjitë e avancuara.

Diskutimi do të shqyrtojë se si IA mund të përdoret në mënyrë efektive për të përmirësuar sigurinë, duke adresuar njëkohësisht rreziqet e mundshme të keqpërdorimit të saj.

-Advertisement-

Në sesionet kryesore do të flasin Xhelal Sveçla, Ministër i Punëve të Brendshme.

Për rolin e IA-së në Luftën Kundër Terrorizmit dhe Sigurinë Kombëtare, do të ketë prezantim nga Scott Bates, Bashkëpunëtor i Lartë në American Security Project. Bates do të trajtojë se si teknologjitë IA po integrohen në strategjitë e sigurisë dhe çfarë ndikimi kanë për sigurinë kombëtare dhe globale.

“Pas këtyre prezantimeve, do të zhvillohet një diskutim i hapur, ku pjesëmarrësit mund të shkëmbejnë ide, të ndajnë perspektiva dhe të ofrojnë rekomandime për përdorimin e përgjegjshëm të IA-së në sigurinë kombëtare. Kjo ngjarje përfaqëson një mundësi unike për debat dhe shkëmbim njohurish, duke u mundësuar profesionistëve të medias të angazhohen drejtpërdrejt me ekspertë të njohur dhe udhëheqës të mendimit në këtë fushë. Pjesëmarrësit do të fitojnë njohuri mbi rolin kritik që luan IA në strategjitë moderne të sigurisë dhe masat e kujdesit të nevojshme për të shmangur keqpërdorimin e saj”, thuhet në njoftimin e Qendrës Amerikane për Luftimin e Ekstremizmit dhe Terrorizmit.

Subscribe në YouTube: GAZETA INFOKUSI