Vendimi për dozën e tretë dhe dozën përforcuese të vaksinës kundër koronavirusit pritet të merret shumë shpejt edhe në Kosovë.

“Është çështje ditësh marrja e vendimit, pasi Komiteti për imunizimin e popullatës kundër COVID-19 [sëmundjes që e shkakton koronavirusi] e ka trajtuar çështjen e dhënies së dozës përforcuese dhe dozës së tretë”, konfirmoi për Radion Evropa e Lirë Ministria e Shëndetësisë e Kosovës.

Instituti Kombëtar i Shëndetësisë Publike të Kosovës i ka rekomanduar Ministrisë së Shëndetësisë qysh në muajin shtator që të nisë me dhënien e dozave të treta.

Dozat e tilla kanë nisur të jepen në shumë vende të botës, pas rekomandimeve nga Organizata Botërore e Shëndetësisë dhe rregullatorë të tjerë shëndetësorë.

Dozë përforcuese është ajo që i jepet një personi plotësisht të vaksinuar, për t’i ndihmuar në përforcimin e mbrojtjes që mund t’i ketë rënë me kalimin e kohës.

Dozë e tretë konsiderohet ajo që i jepet dikujt që nuk ka krijuar përgjigje të fuqishme imunitare nga seritë e para të vaksinimit.

Kosova ka nisur fushatën e vaksinimit në fund të marsit dhe deri më 10 nëntor më shumë se 745,000 qytetarë – apo mbi 41 për qind e popullatës së përgjithshme – i kanë marrë nga dy doza të vaksinës.

Ahmeti: Doza e tretë për të parandaluar situata të rënda epidemiologjike

Profesori në Fakultetin e Mjekësisë në Universitetin e Prishtinës, Sali Ahmeti, thotë për Radion Evropa e Lirë se Kosova, që të jetë e përgatitur për ndonjë valë më të ashpër të pandemisë COVID-19, duhet të vendosë për administrimin e dozës së tretë të vaksinës.

Sipas tij, gjashtë muaj pas dozës së dytë të vaksinës, imuniteti fillon të ulet nën vlerat mbrojtëse.

“Ne kemi filluar me vonesë vaksinimin, në raport me vendet tjera. Vaksinimi masiv ka filluar nga qershori dhe [të vaksinuarit] kanë ende imunitet mbrojtës, solid, por gjashtë muaj pas dozës së dytë, unë preferoj të merret edhe doza e tretë, si në vendet e tjera”, thotë Ahmeti.

Autoritetet shëndetësore në Kosovë konfirmuan të mërkurën se kanë identifikuar variantin Delta Plus të koronavirusit në 12 mostra.

Ky variant, i identifikuar nga shkencëtarët britanikë në muajin shtator, është duke u monitoruar nga shkencëtarët për të parë nëse është më ngjitës ose më vdekjeprurës se variantet e tjera.

Presidenti i UNI z. Alejtin Berisha, folës mbi temën “Women’s Role in Artificial Intelligence Development” në DOKUTECH, edicioni i 11-të

Sponsoruar