Shefi i Qendrës së Vaksinimit në Dragash, Bekim Vehapi bashkë me mjekun e kësaj qendre Fehmi Baxhaku janë të vetmit zyrtarë të shtetit që janë gjobitur për procesin e vaksinimit në Kosovë.

Ata bashkë, janë gjobitur nga Inspektorati Shëndetësor i Kosovës me 1 mijë e 500 euro.

Njëri se nuk qëlloi në vend të punës kur ishte inspektuar qendra e tjetri se kishte vaksinuar më shumë persona se që lejohej në atë kohë.

Sipas drejtorit të Qendrës Kryesore të Mjekësisë Familjare në Dragash, Ramadan Jashari gjoba e parë ndaj shefit të Qendrës së Vaksinimit u bë për arsye se u vaksinuan dy inspektorë komunalë të cilët në atë kohë nuk kishin prioritet vaksinimi në bazë të moshës.

“Janë dy gjoba njëra për shefin e vaksinimit në vlerë 1 mijë euro dhe 500 euro mjekun. Arsyeja e Inspektoratit pse e ka shqiptuar gjobën është se e para ka qenë në lidhje me vaksinimin e dy inspektorëve komunalë që kanë qenë nën moshën 65 vjeçare”, ka thënë Jashari.

Derisa sipas tij gjoba e dytë thotë se është krejtësisht e pabazuar.

Kjo sepse është gjobitur me 500 euro një mjek i cili ka qenë gjithmonë në vendin e tij të punës në qendrën e vaksinimit në Dragash, ndërsa është dënuar pse nuk ka qenë në Qendrën tjetër në Prizren.

LEXO EDHE: Gjobitet qendra e vaksinimit në Dragash

“Gjoja se nuk ka qenë në vendin e punës në Qendrën e Mjekësisë Familjare në Prizren atje dhe nuk kanë ditë që është bërë transferimi në Qendrën e Vaksinimit në Dragash. Dhe kështu inspektorat kur kanë shkuar atje në Qendrën e Vaksinimit në Prizren në evidencë e kanë pasë emrin e doktorit, Fehmi Bagjaku ndërsa ai faktikisht ka qenë duke punuar në Qendrën e Vaksinimit në Dragash. Që ka qenë i rregullt ditë. Një gjobë krejtësisht e pa bazë”, ka thënë drejtori i QKMF-së Ramadan Jashari për Infokus.

Këtë e ka konfirmuar për Gazetën Infokus edhe zëvendësuesi i kryeinspektorit Shëndetësor, Shaban Osmanaj, por nuk ka përmendur fare gjobën që i është dhënë doktorit Fehmi Bagjaku.

“Ju informojmë se për shkak të mos zbatimit të vendimit të Qeverisë për prioritet e personave që duhet të vaksinohen, është gjobitur dhe shefi i Qendrës së Vaksinimit të Dragash”, ka thënë shkurt ai.

Probleme të tilla ka pasur edhe në qendra të tjera të vaksinimit, jo vetëm në atë të Dragashit.

Madje, Gazeta Infokus kishte raportuar se Qendra e Vaksinimit në Shtërpcë në kohën kur kishte orarin për të vaksinuar qytetarët ishte fare e mbyllur, por nuk dihet nëse ndaj kësaj qendre është shqiptuar ndonjë gjobë apo jo.

Në përgjigjen e Inspektoratit të MSH-së në pjesën për gjobat përmendet vetëm qendra e vaksinimit në Dragash./Gazeta Infokus/ 

BKT Kosova dhe Komiteti Olimpik i Kosovës nënshkruajnë vazhdimin e marrëveshjes së sponsorizimit për periudhë 10-vjeçare

Sponsoruar