Në këtë rast, Murtezi-Bytyqi po akuzohet se në cilësinë e noteres në mënyrë të kundërligjshme ka përpiluar një anekse-kontratë, duke ndryshuar bashkë-blerësit e lokalit, ndërsa Agim Spahiu e Bekim Maloku akuzohen se kanë ndihmuar të njëjtën në kryerjen e veprës penale

Lidhur me mungesën e prokurores Gjonbalaj, e cila është edhe përpiluese e kësaj aktakuze, gjykatësi i rastit Gëzim Ademi ka thënë se nuk mund të konstatohet nëse e njëjta është ftuar në mënyrë të rregullt për faktin se fletë kthesa ende nuk është kthyer në gjykatë.

Ndërsa, për mungesën e avokatit Makolli, i akuzuari Maloku tha se i njëjti e ka njoftuar atë paraprakisht se nuk mund të jetë i pranishëm në seancë.

Kështu, në këto rrethana seanca e shqyrtimit fillestar u shty, ndërsa e radhës u caktua më 17 korrik 2023.

Ndryshe, sipas aktakuzës së përpiluar më 25 janar 2023, nga Prokuroria Themelore në Prishtinë, noterja Valbona Murtezi-Bytyqi akuzohet për keqpërdorim të detyrës apo autoritetit zyrtar, ndërsa Agim Spahi dhe Bekim Maloku akuzohen se i kanë ndihmuar të njëjtës për kryerjes e veprës penale.

Sipas aktit akuzues, më 15 shkurt 2022, e pandehura Valbona Murtezi-Bytyqi në cilësinë e noteres të cilës i janë besuar kryerja e autorizimeve publike që të vendos për të drejtat, obligimet ose interesat e personave fizik e njëjta me dashje dhe me qëllim të përfitimit të dobisë pasurore për vete apo tjetrit ka vepruar në mënyrë të kundërligjshme ashtu që ka përpiluar “Aneks Kontratën për shitblerjen e paluajtshmërisë – lokalit në lagjen Ulpiana”.

E përmes të cilit, aktakuza thotë se e pandehura Murtezi-Bytyqi ka ndryshuar njërin nga dy bashkë-blerësit në këtë rast të dëmtuarin Krenar Alidema sipas kontratës bazë, të cilën e pandehura e ka përpiluar pa e pasur pëlqimin apo aprovimin e tij për tërheqje dhe pa e nënshkruar, i cili edhe kishte kryer edhe obligimin sipas kontratës bazë, pagesën e shumës së caktuar për blerjen e lokalit, në bashkë blerësin e ri të pandehurin Agim Spahiu.

Tutje aktakuza thotë, se me ketë rast i ka shkaktuar dëme të dëmtuarit Alidema, duke ia mohuar të drejtat parapara në kontratën bazë dhe ka përfituar personi tjetër, ndërsa i pandehuri Spahiu ku pas lidhjes se aneks kontratës nga e pandehura i njëjti është duke e shfrytëzuar lokalin i cili ka qenë objekt i kontratës bazë dhe aneks kontratës.

Me këto veprime, Murtezi-Bytyqi po akuzohet se ka kryer veprën penale “Keqpërdorim i pozitës apo autoritetit zyrtar” nga neni 414, paragrafi 2 lidhur me paragrafin 1 të Kodit Penal të Republikës së Kosovës, vepër kjo e dënueshme me gjobë dhe burgim prej tre deri në dhjetë vjet.

Ndërsa, sipas dispozitivit të dytë kësaj aktakuze, të pandehurit Spahiu e Maloku akuzohen se në bashkëkryerje e kanë ndihmuar të pandehurën Murtezi-Bytyqi për kryerjen e veprës penale të përshkruar si më lart të duke nënshkruar “Aneks Kontratën për shitblerjen e paluajtshmërisë-lokalit”, pa qenë prezent dhe në dijeni i dëmtuari Alidema.

Me këtë, Spahiu e Maloku ngarkohen se kanë kryer veprën penale “Ndihmë”, nga neni 33 në kryerjen e veprës penale “Keqpërdorim i pozitës apo autoritetit zyrtar” nga neni 414 paragrafi 2 lidhur me paragrafin 1 të KPRK-së, e cila dënohet më dënim më të butë sesa kryesi i veprës. /BetimipërDrejtësi