Lajme

Deputetët në Strasburg argumentojnë pse Kosova duhet të anëtarësohet në Këshill të Europës

Autori: Gazeta inFokus 11:42 | 29 April 2022

Një delegacion i Kuvendit të Kosovës ka qëndruar sot në Asamblenë Parlamentare të Këshillit të Europës, i cili u prit nga presidenti i Asamblesë Parlamentare të Këshillit të Europës, Tiny Kox.

Deputetja e PDK-së Ariana Musliu-Shoshi, deputeti i AAK-së Besnik Tahiri dhe deputeti i Partisë Demokratike Turke të Kosovës Enis Kervan ishin pjesë e delegacionit.

Sipas njoftimit të Musliu-Shoshit, ata folën për të arriturat e Kosovës në disa fusha, derisa tha se kanë dhënë argumente për anëtarësimin e mundshëm të Kosovës në Këshillin e Europës.

“Sot, në Asamblenë Parlamentare të Këshillit të Europës, si delegacion i Kuvendit të Kosovës u pritem nga presidenti i Asamblesë Parlamentare të Këshillit të Europës, z. Tiny Kox. Gjatë takimit prezantuam të arriturat e Kosovës në fushën e të drejtave të njeriut, demokracisë dhe sundimit të ligjit, si dhe argumentuam anëtarësimin potencial të Kosovës në Këshillin e Europës”, ka shkruar ajo.

Pas përjashtimit të Rusisë nga Këshilli i Europës, e cila nisi agresionin në Ukrainë, Kosova ka shtuar përpjekjet për t’u bërë anëtare e organizatës që promovon të drejtat e njeriut, demokracinë dhe sundimin e ligjit në Europë./Gazeta Express/

Të tjera

Fokusi

lajme