Lajme

Deputetët kërkojnë informacion zyrtar për dorëheqjet në veri

Autori: Gazeta inFokus 16:29 | 27 November 2018

Komisioni për Legjislacion, Mandate, e Imunitete në Kuvendin e Kosovës ka diskutuar të martën për dorëheqjet e kryetarëve të komunave me shumicë serbe.

Ata kërkuan që njoftimi për këto dorëheqje të bëhet në formë zyrtare nga përgjegjësit.

“Për pjesën e veriut duhet të diskutojmë me ministrin. Nuk duhet të diskutojmë pa pas informata zyrtare dhe të bazohemi vetëm në portale”- ka thënë Hajdar Beqa, anëtar i këtij Komisioni, nga PDK.

-Advertisement-

Deputeti i Nismës Socialdemokrate, Bilall Sherifi, ka thënë se Kosova me taksën prej 100% vetëm se ka kundërgoditur, ndaj veprimeve të Serbisë, shkruan gazeta inFokus.

“Situata është ashpërsuar pas historisë së Interpolit dhe masat të cilat janë marrë. Të gjithë e dimë qe janë veprime politike të ruajtjes së dinjitetit. Kosova nuk ka goditë mirëpo ka kundërgoditë, është mbrojte nga veprimet që i ka bë Serbia kundër sovranitetit të Kosovës. Ajo që të gjithë e kanë parë është se është bërë në vetëmbrojte”, ka theksuar Sherifi.

Deputeti nga PSD, Frashër Krasniqi, është shprehur se në këtë fazë i gjithë spektri politik duhet të jetë i bashkuar.

Komisioni ka miratuar disa projektligje, përfshirë edhe propozimet me kandidatët për anëtarë të Këshillit për Ndihmë Juridike Falas dhe formimin e grupit punues për referendum.

Është shtyer për mbledhjen e radhës Raporti me amendamente për Projektligjin për dhënien në shfrytëzim dhe këmbimin e pronës së paluajtshme të komunës.

Në këtë mbledhje u aprovua edhe Grupi punues për Projektligjin për referendum, i cili ka kaluar parimisht në seancë, si dhe u aprovua projektligji për arsimin shqip të viteve ’90.

Komisioni ka miratuar projektligje nga Pakoja për FSK-në.

Sot kanë dhënë dorëheqje të katër kryetarët e komunave veriore të Kosovës, të banuara me shumicë serbe.
Këto dorëheqje vijnë pas rritjes së taksës nga 10 në 100 përqind për produktet me origjinë nga Serbia si dhe arrestimeve të fundit në veri./Gazeta inFokus/

Subscribe në YouTube: GAZETA INFOKUSI