Demokratët përgatiten për të emëruar Nënpresidenten Harris si kandidate për presidente para 7 gushtit
![](https://gazetainfokus.com/wp-content/uploads/2024/07/751f29ad-47cd-4791-9506-d4b6b846b53e-KamalaHarris-600x3601-1.jpg)
Autori: Gazeta inFokus
22:53 | 25 July 2024
Delegatët e Kuvendit Kombëtar të Partisë Demokrate mund të emërojnë Nënpresidenten Kamala Harris si kandidaten e tyre për presidente dhe madje të fillojnë të miratojnë kandidatin për postin e Nënpresidentit, i cili ende nuk është caktuar, në një proces votimi përmes internetit, që fillon javën e ardhshme, ndërsa partia po tenton të veprojë me shpejtësi për t’u bërë bashkë në përkrahje të një kandidati të ri për zgjedhjet e nëntorit.
Komisioni i Rregullave të Kuvendit Kombëtar të Partisë Demokrate miratoi të mërkurën një propozim, sipas të cilit delegatët nga i gjithë vendi do të mund të votojnë për kandidatët e mundshëm presidencialë për të zëvendësuar Presidentin Joe Biden, i cili fundjavën e kaluar u tërhoq nga gara për një mandat të dytë.
Por zonja Harris është demokratja e vetme kryesore e cila ka njoftuar publikisht se kërkon emërimin e partisë, çka do të thotë se është thuajse e sigurtë që kandidimi i saj të miratohet në vetëm një raund votimi në internet që fillon në 1 gusht, 18 ditë para se të nisë punimet Kuvendi Kombëtar Demokrat në Çikago.
Kryetari i Komitetit Kombëtar Demokrat Jaime Harrison iu referua tronditjes së pashembullt të garës presidenciale pas largimit të zotit Biden, duke u thënë anëtarëve të organit të Kuvendit që përcakton rregullat se “në këtë natë të errët, shohim yjet tanë më të shndritshëm”.
Plani u miratua pas rreth 90 minutash diskutimi në internet ku pati pak kundërshtime. E gjithë paketa e rregullave të Kuvnedit u miratua në fund me 158 vota pro dhe 3 kundër.
Sipas këtyre rregullave, zonja Harris dhe çdo kandidat tjetër demokrat që synon ta sfidojë atë duhet të depozitojë firmat elektronike të 300 delegatëve të Kuvendit, nga të cilat, më shumë se 50 firma nuk duhet të jenë nga i njëjti shtet. Nënshkrimet elektronike duhet të depozitohen brenda mbrëmjes së datës 30 korrik.
Kualifikimi i shumë kandidatëve mund të çojë në disa raunde votimi për disa ditë. Por, nëse zonja Harris është kandidatja e vetme, votimi do të fillojë më 1 gusht.
Delegatët do të mund të marrinë fletën e votimit përmes një email-it të sigurtë. Procesi pritet të hartohet jo vetëm për të emëruar zyrtarisht zonjën Harris, por me shumë gjasë edhe kandidatin e saj për Nënpresident, përpara gushtit, duke i lënë asaj pak kohë për të vendosur emrin që do zgjedhë si krahun e djathtë në garën presidenciale.
Është ende e paqartë se cilin mund të zgjedhë ajo. Deri tani emrat më të mundshëm janë guvernatori i Kentakit, Andy Beshear, guvernatori i Pensilvanisë, Josh Shapiro, guvernatori i Karolinës së Veriut, Roy Cooper, Senatori i Arizonës, Mark Kelly, por ka të ngjarë që të jenë duke u shqyrtyar edhe rreth 12 kandidatë të tjerë.
Zoti Biden u tërhoq nga gara fundjavën e kaluar dhe mbështeti zonjën Harris. Që atëherë qindra anëtarë demokratë të Kongresit dhe guvernatorë, sindikatat kryesore të punës dhe organizata aktiviste i kanë dhënë asaj përkrahje për të zëvendësuar zotin Biden.
Një anketim i agjencisë së lajmeve Associated Press i delegatëve të Kuvendit tregoi se Nënpresidentja ka mbështetjen e më shumë se 1,976 delegatëve që i duhen për të fituar që në raundin e parë të votimit brenda partisë së saj,
Megjithatë, kjo nuk e bën atë automatikisht të emëruarën e partisë dhe forca e saj politike po nxit procesin e votimit virtual nën argumentin se nuk mund të pritet deri në nisjen e Kuvendit për të zgjedhur formalisht kandidatin e partisë.
Partia Demokrate vë në dukje se shkak për këtë është afati i përcaktuar në fletët e votimit të shtetit të Ohajos se kandidatët duhet të zgjidhen dëri në 7 gusht.
Edhe pse ligjvënësit e Ohajos kanë miratuar ndryshimin e këtij parashikimi, ai hyn në fuqi në 1 shtator dhe avokatët e Kuvendit Kombëtar Demokrat paralajmëruar se mosrepsektimi i afatit fillestar mund të ketë pasoja ligjore.
“Partia jonë mbështet një proces të hapur, të drejtë dhe transpartent”, tha Minyon Moore, drejtuese e Kuvendit Kombëtar Demokrat. “Ne do veprojmë ashtu siç duhet”./VOA
![](https://gazetainfokus.com/wp-content/uploads/2024/08/f1.jpg)
Të tjera
-
Vdẹs një kosovar në plazhin e Velipojës
Një 82-vjeçar nga Kosova ka humbu jetë si pasojë e një arreesti kardiak. Ngja...
-
Osmani takohet me të Ngarkuarën me Punë të ShBA-së në Kosovë, flasin për koordinimin, Banjskën e lụftimin e ilegalitetit
Presidentja e vendit, Vjosa Osmani, gjatë kësaj jave është takuar me të Ngark...
-
Vdẹs një 67-vjeçare në plazhin e Durrësit
Një 67-vjeçare ka vdekur sot në plazhin e Durrësit, pasi është futur për t’u ...
-
Largohen bllokadat, hapen për qarkullim pikat kufitare në Merdarë e Bërnjak
Ministri i Brendshëm, Xhelal Sveçla ka bërë të ditur se pikat kufitare në Mer...
-
Kurti lavdëron ish-presidentin Rugova
Kryeministri i Republikës ë Kosovës, Albin Kurti, ka marrë pjesë në ceremonin...
-
Rrạhja në Emshir, nga një muaj paraburgim ndaj tre të dyshuarve
Gjykata Themelore Prishtinë, Departamenti i Përgjithshëm – Divizioni për ...
-
Osmani: Prapa bllokadave në pikat kufitare me Kosovën qëndron shteti serb
Presidentja Vjosa Osmani, pas zbulimit të shtatores së Ibrahim Rugovës në Pod...
-
Vdẹs një fëmijë 2 vjeçar nga Podujeva, Policia nis hetimet për rastin
Një rast i rëndë ka ndodhur në një familje në Podujevë, pasi fëmija i tyre 2-...
-
Mefail Bajqinovci: Nuk e lexova asnjë reagim apo dënim nga BE-ja për bllokimin e pikave kufitare
Deputeti i Lëvizjes Vetëvendosjes, Mefail Bajqinovci, ka kritikuar opozitën d...
-
Haradinaj godet Osmanin, Kurtin e Gërvallën: Kur e përmendni ju Rugovën, atij i rrotullohen eshtrat në varr
Kreu i AAK-së, Ramush Haradinaj, ka reaguar ndaj presidentes Vjosa Osmani, kr...
-
SHBA trajnon ushtarë për t’i nisur drejt Kosovës: Siguria dhe stabiliteti i Kosovës dhe rajonit janë të një rëndësie strategjike
Faqja e përfaqësisë së Ushtrisë së SHBA-së në NATO ka publikuar një njoftim p...
-
Vjosa Osmani e Albin Kurti zbulojnë bashkë shtatoren e Presidentit historik, Ibrahim Rugova
Në qytetin e Podujevës në një ceremoni të organizuar nga Komuna sot është zbu...