Lajme

Deda: Dorëheqjet në veri u bënë me urdhër të Vuçiqit

Autori: Gazeta inFokus 16:41 | 27 November 2018

Deputeti i Parlamentit të Kosovës Ilir Deda, në llogarinë e tij në rrjetin social Facebook, ka komentuar dorëheqjen e kryetarëve të komunave në pjesën veriore të vendit.

Deda, ka potencuar se këto dorëheqje, janë kryekëput me urdhër të Presidentit të Serbisë Aleksander Vuçiq dhe se kjo, sipas Dedës, është veprim i njëanshëm i prishjes së marrëveshjes të Brukselit nga ana e Serbisë.

“Sot shihet qartë brishtësia dhe thyeshmëria e marrëveshjeve “historike” në Bruksel, duke hyrë në finalen e përpjekjeve për ndarjen e Kosovës, me përshkallëzim të gjendjes politike e të sigurisë në pjesën veriore të shtetit”, ka shtuar Deda.

-Advertisement-

Sipas Dedës, kosovarët nuk duhen të bien në kurthe të tjerëve.

“Sot na duhet mençuri, maturi, bashkërendim të veprimeve dhe konsensus – i cili edhe ashtu është mese i vonshëm”, ka shkruar Deda.

Deda, më tej, ka shtuar se Qeveria e Kosovës, duhet të konkretizojë dhe sqarojë që taksa prej 100% ndaj produkte të prodhuara në Serbi do të hiqet kur Serbia t’i kthehet “normalizimit të marrëdhënieve” duke:
1. E ndalë në mënyrë të verifikueshme fushatën ndërkombëtare kundër Kosovës;
2. Në mënyrë të plotë e zbaton marrëveshjen për energji; marrëveshjen për IBM; marrëveshjen për kadastër e regjistër civil, si dhe marrëveshjen për diploma universitare./Gazeta inFokus/

Subscribe në YouTube: GAZETA INFOKUSI