Lajme

Dardan Molliqaj reagon pas takimit Kurti-Vuçiq në Munih

Autori: Gazeta inFokus 20:52 | 14 February 2020

Kryetari i Partisë Socialdemokrate të Kosovës, Dardan Molliqaj, ka reaguar pas nënshkrimit të dy marrëveshjeve mes Kosovës e Serbisë në Munih në praninë e ambasadorit Richard Grenell, duke thënë se ky proces po vazhdon me kokë të vjetër, e bisht të ri, duke iu referuar Hashim Thaçit e Albin Kurtit.

Madje, ish-anëtari i Vetëvendosjes, e ka akuzuar kryeministrin Kurti se po bëhet bisht i heshtur i presidentit Thaçi.

Postimi i plotë i Molliqajt:

-Advertisement-

DIALOGU ME SERBINË: KOKA E VJETËR, BISHTI I RI

Sot u nënshkrua me Serbinë edhe një marrëveshje e re, mbi bazën e procesit të vjetër të dialogut. Një dialog larg syve të publikut; marrëveshje që publikohen vetëm pasi të jenë nënshkruar; pa debat shoqëror e politik paraprakisht; me figurën e njëjtë në krye të këtij procesi – Thaçin – të pandryshuar e të pasfiduar. Sot pra, u nënshkrua edhe një marrëveshje me logjikën e njëjtë të 9 viteve të fundit: marrëveshje për pjesët por jo për tërësinë; marrëveshje për probleme më të vogla, pa e zgjidhur njëherë problemin politik në mes dy vendeve. Pa e arritur marrëveshjen përfundimtare që do të sillte njohje reciproke dhe pranim të subjektivitetit politik të shtetit të Kosovës nga Serbia.

Por, po aq e rëndësishme dhe ogurkeqe është heshtja absolute e kryeministrit Kurti. Heshtje kjo, me të cilën ai në fakt po flet shumë dhe po tregon që është bërë pjesë e projektit të vjetër të dialogut. Heshtje kjo, përmes së cilës po i heqë vetes çdo përmbajtje politike që e kishte artikuluar deri tash dhe përmes së cilës erdhi në pushtet.

Sot Albin Kurti, duke iu bashkuar përmbajtësisht projektit të Hashim Thaçit, po bëhet bishti i heshtur i Hashim Thaçit. Sot ai po tregon që pavarësisht nëse bashkërendimin me Thaçin nuk e ka të formalizuar, ai po ecë hapave të tij, pas tij, sepse ka zgjedhur projektin e tij.

Subscribe në YouTube: GAZETA INFOKUSI

Të tjera

Fokusi

lajme